Skýrsla stjórnar FÍR fyrir árið 2000

RSÍ 30 ára, kvennalandsliðið styrkt.
Síðasta haust varð RSÍ 30 ára. Í tilefni af því var lagt meira í Jónsmessuhátíðina síðastliðið sumar. Þangað komu á þriðja hundrað manns og var fádæma góð stemming. Í september var haldin fjölskylduhátið í og við nýja húsið, töluverður fjöldi gesta kom og skoðaði húsið og tók þátt í skemmtiatriðum, m.a. að spila við kvennahandboltalandsliðið.

RSÍ gerðist aðalstyrktaraðili íslenska kvennahandboltalandsliðsins, með 3ja ára samning. Með því vill RSÍ minna á það forvarnarstarf sem unnið er í íþróttahreyfingunni. Í samningnum stendur m.a. : A-landslið kvenna í handknattleik mun leika með auglýsingu frá RSÍ á keppnisbúningum sínum Á æfingabúningi verður auglýsing frá skólum rafiðnaðarmanna. Landsliðsmenn og þjálfarar HSÍ munu taka þátt í kynningarstarfi RSÍ Tvö skilti með merkjum RSÍ og Rafiðnaðarskólans verða sett upp á öllum landsleikjum, A-landsliða karla og kvenna, í handknattleik hérlendis. RSÍ verður helsta stuðningsfyrirtæki HSÍ og íslenska kvenna landsliðsins í handknattleik í sambandi við undirbúning og þátttöku liðsins í stórmótum til 31. mars 2003. Fyrir auglýsingar við leikvöll og á keppnisbúningi mun RSÍ og Rafiðnaðarskólinn greiða HSÍ kr. 2.100.000 (auk vsk) á meðan á samningstíma stendur. RSÍ mun verðlauna árangur A-landsliðs kvenna sérstaklega nái landsliðið eftirfarandi árangri á samningstímanum, 200.000 kr. fyrir að spila í forkeppni HM sem haldinn verður í nóvember árið 2000.og 200.000 kr. fyrir að spila í áskorendaleik um sæti á HM í maí árið 2001.

Heimasíðan
Umfang heimasíðu RSÍ hefur vaxið jafnt og þétt. Greinilegt er að félagsmenn og aðrir nota síðuna mikið og fer heimsóknum stöðugt fjölgandi og hafa undanfarið farið í um 1.200 á viku að jafnaði. Þar er mikið magn af upplýsingum um launamál og kjarasamninga sambandsins. Auk þess eru ítarlegar upplýsingar um sjóði sambandsins og réttindi félagsmanna. Í vetur kom fram ósk um að birta fundargerðir miðstjórnar og eru þær komnar á heimasíðna.

Heimasíðan hefur auk þess reynst mjög góður vettvangur til þess að koma á framfæri upplýsingum um starfsemina og skoðunum og sjónarmiðum sambandsins. Mikil greinaskrif voru á síðunni síðasta ár þá sérstaklega vegna undirbúnings þings ASÍ. Þar kynntum við sjónarmið okkar hvers vegna við töldum að breyta þyrfti skipulagi ASÍ. Margir í verkalýðsforystunni virtust ekki þola þessa umræðu, en í stað þess að svara með málefnanlegum hætti var lagst í hinar venjubundnu skotgrafir, eins og reyndar er algengt meðal okkar íslendinga. Fræg ummæli nóbelskálsins í Innansveitarkróníku lýsa þessu vel, “ Því hefur verið haldið fram að íslendingar beygi sig lítt fyrir skynsamlegum rökum, fjármálarökum varla heldur, en leysi vandræðu sín með því að stunda orðhengilshátt og deila um tittlingaskít sem ekki kemur málinu við, en verði skelfingu lostnir og setji hljóða hvenær sem komið er að kjarna málsins.” En við urðum áþreifanlega varir við að mjög margir lesa þau sjónarmið, sem sett eru fram á síðunni og oft vitnað til hennar í fjölmiðlum. Árangur þessarar baráttu var m.a. nýtt skipulag ASÍ sem var samþykkt á síðasta þingi, það var nánast eins og við höfum barist fyrir.

Gríðarlegur vöxtur síðunar hefur leitt til þess að slóðir eru ekki alltaf nægilega greinilegar. Í undirbúningi er endurhönnun síðunnar, eins verður hún gerð gagnvirkari m.a. með því að félagsmenn geti slegið inn félagsnúmer sitt og fengið upplýsingar um stöðu sína, t.d. punktafjölda í orlofskerfinu. Eins upplýsingar um hvaða orlfoshús eru laus og sótt um orlofshús.

Samkomulag við Eflingu og Starfsgreinasambandið um félagsaðild
Í þessum viðræðum var farið yfir hvernig félagsaðild yrði háttað. Samkomulag varð um að fylgja þeim meginlínum, að þeir sem tækju stutt námskeið í rafiðnaðargreinum og störfuðu á starfsviði rafiðnaðarmanna gætu sjálfir valið um hvort þeir væru í félögum innan Starfsgreinasambandsins eða innan RSÍ. En þeir sem væru í skipulögðu rafiðnaðarnámi væru eins og áður í Félagi nema í rafiðngreinum. Þeir sem hefðu lokið námi í grunndeild og færu þá út á vinnumarkaðinn og störfuðu við rafiðnaðarstörf væru innan RSÍ, þá í Félagi tæknifólks, þ.e.a.s. ef þeir vildu vera félagar í stéttarfélagi.

Þetta samstarf hefur gengið vel, nokkuð hefur verið um að menn hafi viljað færa sig yfir til okkar en vinnuveitandinn hefur hafnað því. Það er þetta með félagafrelsið, það er nokkrir sem túlka það þannig, að það sé frelsi vinnuveitenda til þess að ákveða hvort og þá í hvaða stéttarfélagi launamenn séu.

Trúnaðarráðstefna RSÍ 2000
Dagana 20. – 22. október var hin árlega trúnaðarráðstefna RSÍ haldin í Ingólfshvoli í Ölfusi. Ráðstefnugestir voru 73 og bjuggu í Ölfusborgum. Ráðstefnan hófst föstudag kl. 19.30 á því að Gunnar Árnason sjóðsstjóri hjá Lífiðn fór ítarlega yfir séreignardeild sjóðsins og þá valmöguleika í ávöxtunarleiðum sem sjóðurinn býður upp á. Í dag nýta tæplega fjórðungur félagsmanna RSÍ sér ný ákvæði kjarasamninga um séreign. Það er mun hærra hlutfall en hjá öðrum, en er víðsfjarri því að vera ásættanlegt. "Þessi sparnaður er svo hagstæður þegar mótframlag atvinnurekanda er komið inn í dæmið ásamt framlagi ríkisins", sagði Gunnar, "að það er einkennilegt að fleiri skuli ekki nýta sér þennan sparnaðarmöguleika og við munum gera átak í því að kynna það fyrir sjóðsfélögum."

Næst fór Stefán Ó. Guðmundsson yfir starfsemi Fræðsluskrifstofu rafiðnaðarins. Skrifstofan er nýflutt ásamt Fræðsluskrifstofu Matvís í nýja húsið að Stórhöfða 31. Helstu verkefni Fræðsluskrifstofunnar eru samskipti við Menntamálaráðuneytið m.a. umsjón sveinsprófa, námssamninga og endurskoðun námsskráa rafiðngreina. Einnig metur skrifstofan nám og réttindi þeirra sem vilja hefja nám í rafiðnaðargreinum, einnig fjallar hún um réttindi erlendra rafiðnaðarmanna.

Þá var komið að Birni Ágúst Sigurjónssyni formanni orlofsnefndar. Hann fór yfir fyrirhugaðar framkvæmdir á vegum nefndarinnar og útleigu orflofseigna RSÍ. Mikil umræða varð um framleigu orlofshúsa og hvernig hún hefur vaxið undanfarin misseri. "Það er óásættanlegt að fjölmargir félagsmenn standi í langri biðröð eftir orlofshúsi, á meðan utanfélagsmenn eru að nýta húsin. Við erum að greiða niður hverja viku um 20 þús. kr. úr félagssjóði og þeir peningar eiga að renna til félagsmanna og barna þeirra, ekki annarra. Til þess að sporna gegn þessu verður frá og með næstu áramótum teknir þrír punktar af fyrir hverja vetrarleigu. Einnig kemur til greina að vera með tvennskonar gjaldskrá. Óbreytta fyrir félagsmenn, en ef komið er að einhverjum utanaðkomandi í húsunum þá verða þeir að greiða fullt verð eða kr. 35 þús fyrir hverja viku."

Dagskránni lauk kl. 11.30 á föstudagskvöld og kl. 9.00 á laugardagsmorgun mættu Ásmundur Stefánsson og Rannveig Einarsdóttir og fjölluðu um samningatækni og samskipti innan samninganefnda. Innlegg þeirra var vægast sagt mjög fróðlegt og almenn ánægja meðal ráðstefnugesta. Á laugardagskvöld var sameiginlegur kvöldverður.

Á sunnudagsmorgun hófst ráðstefnan kl. 10.00 með því að formaður RSÍ fjallaði um starfsemi RSÍ. Hann fór sérstaklega yfir félagsgjaldið og hvernig það skiptist. Félagsgjaldið breytist nú um áramótin úr 2% af daglaunum í 1,15% af heildarlaunum. Það er rúmlega 15% lækkun á félagsgjaldinu.

Félagsgjaldið skiptist þannig í dag 40% fer til sambandsins, 35% til aðildarfélags, 14% í vinnudeilusjóð, 10% í orlofssjóð og 1% í styrktarsjóð. Sambandið sér um allan félagslegan rekstur, gerð og umsjón kjarasamninga. Allir starfsmenn eru hjá RSÍ og flestallir félagsfundir eru haldnir á sameiginlegum grunni á vegum RSÍ. Sambandið hefur með að gera alla umsjón sjóða rafiðnaðarmanna, orlofssjóð og umsjón og viðhald orlofshúsa. Styrktarsjóð, úthlutun dagpeninga, íþóttastyrkja, útfararstyrkja og annarra styrkja. Umsjón verkfallsjóðs og menningarsjóðs sem á allar húseignir RSÍ eins og Stórhöfðann og skrifstofur út á landi.

Aðildarfélög nýta sinn hluta til kostnaðar vegna stjórnarfunda og einnig eiga þau stóran hluta þess húsnæðis sem Rafiðnaðarskólinn er í. Þau styrkja skólann í því formi að húsaleiga er í lágmarki og oft er hún gefin til baka í formi kennslutækja.

Verkfallssjóður RSÍ er einn fárra innan ASÍ og er sá langsterkasti pr. félagsmann. Einnig býr sambandið að því skipulagi að það er með 25 sér kjarasamninga þannig að hverfandi líkur eru á að allt sambandið fari samtímis í verkfall. Þó að hluti félagsmanna sé í átökum, þá er hinn hlutinn í vinnu og greiðir í sjóðinn. Guðmundur svaraði spurningum um hvort hægt væri að lækka félagsgjaldið frekar. "Það er hægt, en hvað vilja menn þá taka í burtu? Við erum með 5 starfsmenn í félagslegu þjónustunni og umsjón orlofshúsanna, það er ekki hægt að minnka þar nema þá að skerða þjónustuna, sem ég á ekki von á að félagsmenn sætti sig við. Þá er það verkfallssjóðurinn mörg stéttarfélög eru ekki með verkfallssjóð, en eftir því sem ég hef heyrt á félagsfundum, þá á ég ekki von á það sé vilji til hjá okkur að skerða hann. Það væri þá helst að lækka þann hluta sem rennur til aðildarfélaga, en ég á ekki von á að aðildarfélögin séu tilbúin til þess".

Síðan tók skrifstofustjóri RSÍ Helgi R. Gunnarson við og fór yfir reglugerð Styrktarsjóðsins. Sjóðurinn er með ákaflega rúma reglugerð og eru félagsmenn með góðar tryggingar í gegnum sjóðinn. Hann greiðir 250 þús. kr. vegna útfarar, auk þess greiðir hann svipaða upphæð til eftirlifandi maka og einnig bætur til barna sem eru undir 18 ára. Sjóðurinn tryggir sjóðfélögum eftir að greiðslum frá atvinnurekenda lýkur 80% af meðaltali launa næstliðinna 6 mánaða. Sama gildir um fæðingar- og foreldraorlof. Auk þess greiðir hann styrki vegna áfengismeðferðar, glasafrjógvunar, lýtaaðgerða og lyfjakostnaðar auk þess eru heimildir til þess að styrkja félagsmenn í sérstökum tilfellum.

Gjaldkeri RSÍ Rúnar Bachmann fór yfir fjárhagsáætlun RSÍ og sjóða sambandsins fyrir 2001. Áætlaðar tekjur sambandsins verða á næsta ári um 41.5 millj. kr. Áætluð gjöld skiptast í laun og rekstrarkostnað 21 millj. Funda- og fræðslukostnaður 7 millj. Samningar 4 millj. Heimasíða og jólablað RSÍ blaðsins 4.8 millj. Félagsstarf, fjölskylduhátíð, golfmót 2.7 millj. Ýmis kostn. m.a. styrkur til kvennahandboltalandsliðsins 1,2 millj.

Í lok ráðstefnunnar kom skrifstofustj. ASÍ Halldór Grönvold og fjallaði um þær breytingar á fæðingar- og feðraorlofslögum sem urðu um síðustu áramót. Þar er um verulega réttarbót að ræða fyrir launamenn og umtalsverður sigur fyrir þá því fyrir þessu höfum við barist í mörg ár. ASÍ mun gefa út kynningarbæklinga í næsta mánuði.

Alþýðutrygging
Það hefur lengi verið mikið kappsmál rafiðnaðarmanna að kannað yrði innan verkalýðshreyfingarinnar hvort grundvöllur væri á að koma á svipuðu tryggingarkerfi og samtök launamanna á hinum Norðurlöndunum hafa byggt upp. Þetta mál hefur verið á umræðustigi um langt árabil. Eins og kom fram í síðustu skýrslu var ákveðið að stofna undirbúningsfélag, sem myndi láta kanna hvaða tryggingarpökkum væri hægt að koma á og hvað það myndi kosta. Guðmundur Hilmarsson framkv.stj. Undirbúningsfélags Alþýðutryggingar hf kom á fundi hjá RSÍ síðastliðið ár og kynnti stöðu mála. Þar kom m.a. fram að um 18.000 manns stæðu utan verkalýðsfélaga og færi fjölgandi. Þá nema tekjur sjúkrasjóða um 1 milljarð á ári og að rekstrarkostnaður margra sjóðanna væri allt að 50% af tekjum. Fram kom að margir sjúkrasjóðir væru mjög illa á vegi staddir hvað varðaði bótagreiðslur til félagsmanna, en einkennilegt væri að mörg þeirra félaga sem verst væru stödd virtust ekki hafa áhuga á þátttöku, þrátt fyrir að við blasti umtalsverð réttarbót félagsmanna þeirra. Aðeins eru 3 sjóðir sem greiða bætur sem nema allt að 80% af tekjum og er sjúkrasjóður RSÍ einn af þeim. Það þarf um 33.000 manns til þess að þessi trygging geti orðið að veruleika, og fram kom að tryggingin mun aldrei geta náð yfir það svið sem sjóðirnir spanna.

Miðstjórn RSÍ tók jákvætt í það að standa að stofnun tryggingafélags, þrátt fyrir að ekki væri sjáanlegur hagur fyrir félagsmenn RSÍ af þeirri tryggingu sem boðið væri upp á í byrjun. En þar sem hér er um að ræða mikla réttarbót fyrir íslenska launamenn og það væri ábyrgðarhluti að henda því frá sér. Þetta væri einungis fyrsta skrefið í að byggja upp öflugt tryggingafélag samborið við reynslu félaga okkar á Norðurlöndunum. Verzlunarmenn tóku ekki í mál að vera með í þessu og það gerði samsetningu hópsins óhagkvæmari til tryggingar en ella. Á hluthafafundi sem haldinn var í haust kom í ljós að einungis Rafiðnaðarsambandið ásamt þremur öðrum verkalýðsfélögum út á landi lýstu yfir vilja til þess að stofna Alþýðutryggingu. Þá var ekkert annað að gera en að slíta félaginu.

Nú nýlega er farið að hreyfa málinu aftur í framhaldi af því að nokkrir tryggingarmiðlarar hafa haft samband við stéttarfélögin og boðið þeim margskonar hóptryggingar á mjög góðu verði. Að tillögu formanns RSÍ var samþykkt í miðstjórn ASÍ að stofna nokkurskonar tryggingarráð sem reyndi að hafa heildarsýn yfir tilboðin og þá að reyna að ná saman sem flestum stéttarfélögum til þess að ná verðum niður.

Byggingarreglugerð og löggildingar rafvirkjameistara

SART og RSÍ vöktu í vetur athygli á því ófremdarástandi sem skapaðist vegna löggildinga Umhverfisráðuneytisins til handa rafvirkjameisturum samkvæmt Skipulags- og byggingarlögum frá 15. maí 1997 og Byggingarreglugerð frá 1998.

Löggilding Umhverfisráðuneytisins til handa rafvirkjameisturum veitir þeim engan rétt, þar sem að veitingin stangast á við önnur lög og reglugerðir, þ.e.a.s. Lög um öryggi raforkuvirkja, neysluveitna og raffanga. Jafnframt reglugerð um raforkuvirki, en þar segir m.a "B löggilding er löggilding til rafvirkjunarstarfa við lágspennuvirki og til viðgerða á hverskonar rafföngum á lágspennusviði á almennum markaði." Auk þess segir : "Sá sem vill öðlast B löggildingu, sem er löggilding til starfa við lágspennuvirki verður að: Hafa sveinsbréf í rafvirkjun og hafa lokið prófi í meistaranámi rafiðna (sterkstraumssviði) frá viðurkenndum skóla og hafa að auki tveggja ára reynslu að loknu sveinsprófi við störf sem lúta að hönnun og/eða setningu lágspennuvirkja."

Byggingarreglugerðin í heild sinni stenst ekki gagnvart rafvirkjameisturum. Í öllum tilfellum þurfa þeir löggildingu Löggildingarstofu skv. Reglugerð um raforkuvirki.
Skipulags- og byggingarlögum og Byggingarreglugerðinni þarf að breyta hvað varðar hlut rafvirkjameistara. Það þarf að setja inn í lögin og reglugerðina að viðkomandi þurfi að hafa löggildingu Löggildingarstofu skv. Reglugerð um raforkuvirki. Þangað til það er hægt þarf að setja skýrar verklagsreglur um löggildingu rafvirkjameistara og koma í veg fyrir að vaktar séu upp falskar vonir rafvirkja og þeirra annara sem ekki eiga þess kost að öðlast löggildingu Löggildingarstofu skv. Reglugerð um raforkuvirki.

Erindi vegna þessa máls voru send Iðnaðar- og viðskiptaráðherra og Umverfisráðherra.

Deilur við Sultartanga

Á síðasta ári voru deilur vegna faglegs frágangs við Sultartanga og vegna samskipta milli íslenskra fyrirtækja og erlendra. RSÍ mótmælti þeirri mismunun sem felst í því að Landsvirkjun þýðir verkútboð á erlend tungumál, íslensk fyrirtæki verða að kaupa dýra túlkun yfir á íslensku ef þau ætla að geta boðið í verkin. Einnig gagnrýndi RSÍ mismunandi mati sem lagt væri á fagleg vinnubrögð. Þess er krafist réttilega af íslenskum rafiðnaðarmönnum að þeir skili verkum sínum með faglegum hætti og noti viðurkenndan búnað. Gagnvart erlendum fyrirtækjum væri allt annað upp á teningnum. Þau komast upp með lélegan frágang og eru stundum að setja upp búnað sem ekki er viðurkenndur gagnvart íslenskum fyrirtækjum.

Vanir íslenskir rafiðnaðarmenn sem hafa starfað við uppsetningu á fleiri en einni virkjun sögðu að Sultartangavirkjun væri faglegur ruslahaugur. Þegar erlendu rafiðnaðarmennirnir væru farnir yrði Landsvirkjun að laga þann búnað, sem erlendu fyrirtækin hafa komist upp með að setja þar upp og endurmontera þurfi skápa sem þeir hafi sett upp. Í heimsóknum starfsmanna RSÍ á staðin kom í ljós að margt var ábótavant við aðbúnað og öryggistæki á staðnum. Þegar Landsvirkjun var bent á þeta var það lagfært umyrðalaust.

Forstjóri Landsvirkjunar bauð síðar framkv.stjórn RSÍ í skoðunarferð í Sultartanga, þá var búið að lagfæra allt sem misfarist hafði. Forsvarsmenn Landsvirkjunar vonuðust til þess að svona slys myndu ekki koma fyrir aftur, en það væri erfitt að eiga við sum erlendu fyrirtækjanna.

Eins risu upp deilur milli innlendra og erlendra rafverktakafyrirtækja vegna uppgjöra á verkum. Starfsmaður RSÍ fór á fund forsvarsmanns erlendu fyrirtækjanna og afhentu þeim bréf með mótmælum vegna mismunandi faglegra krafna sem gerðar eru til íslenskra og erlendra fyrirtækja. Því var einnig mótmælt að erlendu fyrirtækin gerðu ekki upp við íslenska undirverktaka og þegar þeir reyndu að þrýsta á um greiðslur flyttu erlendu fyrirtækin inn erlenda rafiðnaðarmenn og létu þá ganga í störf íslendinganna. Forsvarmönnum erlendu fyrirtækjanna var bent á þá venju sem tíðkist hér, að rafiðnaðarfyrirtæki og rafiðnaðarmenn gangi ekki inn í verkefni hjá öðrum fyrirtækjum standi yfir deilur um uppgjör eða ógreidd laun.

Forsvarsmaður erlenda fyrirtækisins brást illa við. Þegar starfsmaður RSÍ ætlaði að fara að tala við írsku rafiðnaðarmennina og afhenda þeim einnig þessi gögn, bannaði hann þeim að tala við íslendinga og taka við nokkru skriflegu efni frá þeim. Hinir írsku félagar okkar tjáðu þá starfsmanni RSÍ að ef þeir töluðu við hann þá yrði þeim sagt upp og þeir sendir heim með næstu vél. Rétt er að taka fram að hinir írsku félagar okkar eru greinilega færir og vanir rafiðnaðarmenn. Það er aftur á móti það efni sem þeim er gert að vinna úr og þau afköst sem þeim er gert að skila sem leiða til þess ástands sem er á rafbúnaðinum.

Við nánari athugun virðist enginn hafa löggildingu hér á landi fyrir hið írska fyrirtæki og það er því Landsvirkjun sem leppar það og er því í raun faglega ábyrgt fyrir óvönduðum búnaði og vinnubrögðum. Síðar þurfti að stöðva vélar virkjunarinnar til að skipta út lágspennustýriskápum sem eru faglega óásættanlegir og óhæfir. Einnig þurfit að skipta þá út öðrum hlutum sem reyndust ónothæfir.

Orlofshúsin

Úthlutanir
Í vetur hefur verið unnið að endurbótum á forritinu sem heldur utan um útleigu orlofshúsanna og úthlutanir. Þar er m.a. gert ráð fyrir að hægt sé að tengja heimasíðuna við kerfið þannig að félagsmenn geti séð puntakfjölda sinn, hvaða hús séu laus og sótt um lausar helgar og vikur.

Eftir að sambandið keypti tvö hús á Spáni fyrr í vetur eins og fjallað er um hér aftar. Þá komu fjölmargar beiðnir um að sambandið leigði hús á Spáni í sumar og öðlaðist þannig reynslu fyrir næsta vetur þegar húsin okkar verða sett í leigu. Við því var orðið og var eitt hús leigt. Fjöldi umsókna barst og þegar búið var að úthluta kom í ljós að auðvelt var að fylla aðra íbúð og var hún því leigð. Ákveðið var að leigja húsin út í tveggja vikna pökkum og dreifa jafngildi einnar niðurgreiðslu orlofshúsanna hér heima á hvert tímabil.

Umsóknir um páskana voru nú um þrefallt fleiri en áður. Alls sóttu 95 um þá 29 valkosti sem í boði voru. Langflestir sóttu um íbúðirnar á Akureyri, en einnig umtalsverður fjöldi um potthúsin á Suðurlandi og í Borgarfirði. Inn í þetta spilar örugglega tvennt, ekkert skíðafæri á Suðvesturhorninu og eindæma blíða á landinu. Allt fór út í fyrstu umferð utan annað húsið í Lóni og eitt minni húsanna á Klaustri.

Framleiga húsa og slæm umgengni

Á síðasta ári var mikil umræða meðal félagsmanna um framleigu orlofshúsa og hve mikið hún hafi vaxið undanfarin misseri. Það er óásættanlegt að fjölmargir félagsmenn séu í langri biðröð eftir orlofshúsi, á meðan utanfélagsmenn væru að nýta húsin. Við erum að greiða niður hverja viku um 17 þús. kr. úr félagssjóði að jafnaði og þeir peningar eiga að renna til félagsmanna og barna þeirra, ekki annarra. Til þess að sporna gegn þessu var um síðustu áramót ákveðið að taka þrjá punkta af fyrir hverja helgarleigu um veturna. Einnig kemur til greina að vera með tvennskonar gjaldskrá. Óbreytta fyrir félagsmenn, en ef komið er að einhverjum utanaðkomandi í húsunum þá verða þeir að greiða fullt verð eða kr. 35 þús fyrir hverja viku.

Það er einnig áhyggjuefni að umgegni um húsin hefur í sumum tilfellum ekki verið nægjanlega góð. Þrifnaður er stundum ekki ásættanlegur. Sumir hafa verið með kröfur um að sambandið sjái um þrif milli útleiga. Það segir sig sjálft að ef svo væri þá væri ekki verið að tala um að leigja út hús fyrir þær upphæðir sem útleigan er í dag, leiguverðið þyrfti þá væntanlega að hækka um helming.

Viðhald húsa og ný hús.
Samstarf við Matvís í orlofshúsamálum hefur vaxið og hefur það verið rætt að sameina sem mest viðhaldsvinnu við húsin. Orlofskerfið er orðið mjög umfangsmikið í rekstri, húsin eldast og kalla á meira viðhald. Bera þarf á þau og palla reglulega og heitu pottarnar eru frekir á viðhald. Við höfum árlega gróðursett mikið á orlofssvæðum RSÍ og hefur sú vinna skilað miklum árangri og hafa sum svæðin tekið stakkaskiptum á síðustu árum. Stór og myndarleg kominnog skjól við húsin að aukast.

Á síðasta sumri var boðið upp á nýja valkosti. 3 ný hús voru tekin í notkun við Hæðargarðsvatn við Kirkjubæjarklaustur. Þetta eru 30 ferm. hús með einu svefnherbergi en önnur aðstaða er svipuð og í hinum orlofshúsunum. Húsin voru ekki sett inn í úthlutunarkerfið heldur var þeim úthlutað með sama hætti og í vetrarleigunni, menn geta hringt inn og pantað eina eða fleiri nætur. Þetta reyndist vinsælt og voru húsin í leigu allar helgar og oft í miðri viku. Félagsmenn sem voru á ferð um svæðið nýttu húsin oft í miðri viku. Nokkur húsanna við Hæðargarðsvatn hafa verið í leigu í vetur

Í fyrra gerum við samning við Einingu á Akureyri, þeir fengu eitt húsa okkar í Lóninu en við fengum eitt hús á Illugastöðum, báðir aðilar voru ánægðir með þetta fyrirkomulag og var ákveðið að halda því áfram þetta ár.

Undanfarin ár hefur margsinnis komið upp sú umræða hvort sambandið eigi að kaupa orlofshús erlendis þá hefur sérstaklega verið bent á Spán, sakir þess að mörg starfsmannafélög og einstaklingar hafa keypt fleiri hundruð hús á svæðinu kringum Torreveija, rétt sunnan Alicante. Nú eru þangað reglulegt flug a.m.k. einu sinni á viku frá páskum fram á haust. Því var ákveðið að starfsmenn sambandsins færu þangað í haust og þeir myndu kynna sér hvaða möguleikar væru í boði. Niðurstaða þessa varð sú að RSÍ keypti 2 hús og Matvís keypti eitt. Húsin verða afhent næsta vetur og ætlunin að þau verði tekin í notkun páskana 2002. Þessi umræða varð til þess að fjöldi beiðna kom fram um að sambandið leigði hús í sumar á þessu svæði. Sambandið leigði því tvö hús og eru þau þegar fullleigð.

Einnig var ákveðið að leigja orlofshús í Vestmannaeyjum í sumar og setja það inn í útleigukerfið, golfáhugamenn hafa lýst yfir sérstakri ánægju með þetta framtak.

Í vetur hafa orlofshúsin við Skorradalsvatn verið tekin í gegn, skipt um húsbúnað og skápa. Verandir endurnýjaðar og sett upp útigeymsla. Ákveðið hefur verið að taka þessi hús úr leigu yfir háveturinn, aðkoma að þeim er erfið á veturna, bratt og snjóþungt. Á þeim forsendum hefur miðstjórn ákveðið að það verði ekki settir heitir pottar við húsin á næstunni a.m.k.

Á síðasta ári var farið í svipaðar framkvæmdir á 3 húsum sambandsins við Einarsstaði.

Um áramótin síðustu keypti RSÍ fjórðu íbúðina við Ljósheima. Hún er eins og stærri íbúðin sem við eigum þar, um 80 ferm. með tveimur rúmgóðum svefnherbergjum. Það þurfti að leggja í töluverðar endurbætur á íbúðinni svo hún yrði sambærileg og hinar íbúðirnar. Það var orðin veruleg þörf á að bæta við íbúð hér í Reykjavík, hinar íbúðirnar voru bókaðar langt fram í tímann.

Svignaskarðshúsin hafa verið með vinsælustu húsum sambandsins síðan við skiptum þar um hús og settum upp heita potta upp við húsin. Þetta varð til þess að fleiri stéttarfélög settu upp heita potta við hús sín og vatnsnotkun hefur því margfaldast á svæðinu. Fyrir nokkru barst tilkynning um að nú væri svæðið vatnslaust og taka yrði húsin úr leigu. Þetta snerti okkur vitanlega illa því við vorum búin að leigja húsin út fram í miðjan maí. Vatn er tekið úr mel sem er skammt frá Gljúfurá. Í þurrkum hefur vatni úr ánni verið dælt á melinn. En melurinn var frosinn þannig að ekki var hægt að gera það nú. En með því að láta vatn úr nýrri hitaveitu renna á melinn var hann þýddur og komst vatn á aftur eftir 2ja vikna hlé. Greinilegt er að það verður að taka til hendinni og koma upp öflugri kaldavatnsveitu við Svignaskarð.

Eftir áralanga baráttu fengum við loks að setja upp heita potta við orlofshúsin okkar í Ölfusborgum. Svo einkennilegt sem það nú er þá snéru öll félögin sem barist höfðu hvað harkalegast gegn okkur, við blaðinu og vildu fá heita potta. Þetta varð til þess að auka þurfti afkastagetu heitavatnskerfisins. Eftir að nýja hitakerfið var tekið í notkun síðasta sumar kom í ljós að ekki hafði verið nóg að gert og afkastageta þess var enn ekki nægjanleg. Í vetur hafa farið fram endurbætur og er nú talið að búið sé að komast fyrir alla byrjunarörðugleika. Eins og við héldum fram fyrir daufum eyrum þá hefur notkun húsanna í Ölfusborgun aukist jafnt og þétt síðan heitu pottarnir komu.

Með tilkomu orlofssvæðisins við Apavatn var ákveðið að selja húsin á Snæfoksstöðum og eins Hraunborgum. Eins og kom fram í síðustu skýrslu þá var hætt við að selja húsið í Hraunborgum, sakir þess hversu vinsælt það er. Annað húsið á Snæfoksstöðum var selt strax og var ætlunin að selja hitt síðasta sumar. Ekki fengust viðunandi tilboð í húsið, eins ákvað miðstjórn að fresta fjölgun húsa við Apavatnið á meðan sambandið væri að kljúfa byggingarkostnað á nýju skrifstofuhúsi. Því var ákveðið að fresta sölu hússins, enda er það í leigu allt árið.

Tjaldvagnaútgerðin
Síðastliðið sumar var gerð tilraun með að bæta við 4 nýjum og minni vögnum en þeim sem við höfum verið með. Þessi tilraun mistókst algjörlega, vagnarnir þoldu engan vegin þá notkun sem útleiga og umgengni margra býður upp á. Vagnarnir voru því seldir aftur og nýir vagnar, samskonar og við höfum átt, keyptir í stað þeirra.

Síðasta sumar voru 3 tjaldvagnar staðsettir inni á svæði Útivistar í Básum í Þórsmörk. Þeir voru ekki settir inn í úthlutunarkerfið heldur leigðir út með sama hætti og í vetrarleigunni. Þessi útgerð vakti mikla athygli og ánægju margra. Vagnarnir voru í leigu allar helgar, en lítið í miðri viku. Að fenginni reynslu frá því í fyrra, þá verða tjaldvagnarnir sem voru inn í Þórsmörk settir aftur í útleigukerfið, en fellihýsi keypt og þau sett upp inn í Þórsmörk. Frá vögnunum er stutt í snyrtingar Útivistar og aðgengi að sturtum. Dvalargestum stendur til boða öll dagskrá sem Útivist býður upp á, varðeldar á laugardagskvöldum og gönguferðir um svæðið.

Tjaldvagnaútgerðin hefur undanfarin sumur verið rekin í samvinnu við Matvís og hefur það rekstrarform reynst báðum aðilum farsælt. Nokkrir vagnar hafa verið staðsettir á Akureyri og hafa félagsmenn nýtt sér þann möguleika vel.

Orlofssvæðið við Apavatn
Þegar við tókum við orlofshúsum FÍS við Apavatn þurftu þau umtalsverða endurnýjun. Árið 1999 var sett tjaldstæðið sett hús með snyrtingum og sturtum. Síðasta sumar var skógurinn grisjaður og tjaldsvæðinu skipt upp í bása. Í sumar voru nýttir gamlir símastaurar sem voru á svæðinu og sett upp stærri leiktæki og eins reist grind fyrir opinn skála í fallegu rjóðri á tjaldsvæðinu. Rjóðrið hefur verið nýtt af gestum tjaldsvæðisins á kvöldin til samveru og söngva. Þar verður í vor sett upp vaskur, gasgrill og borð. Vinsældir tjaldsvæðisins hafa verið vaxandi. Við höfum ekki auglýst það utan félagsins, en félagsmenn koma oft með gesti með sér og var stundum fjölmennt þar síðasta sumar.

Veturinn 1999/2000 var skipt um allar innréttingar í orlofshúsunum fjórum og þau endurskipulögð. Í vetur hefur hluti stóra hússins verið tekinn í gegn. Snyrtingar endurnýjaðar og bætt við sturtum. Einnig voru tvö svefnherbergjanna tekin í gegn. Næsta vetur er áformað að ljúka endurnýjun hússins, þá verður eldhúsið flutt inn í salinn, þar sem nú eru tvo lítil svefnherbergi. Þau verða aftur á móti sett upp þar sem eldhúsið er nú og stækka þau umtalsvert við það.

Með tilkomu tjaldsvæðis þá var ákveðið að ráða sumarstarfsmann til þess að sjá um svæðið á Apavatni. Í ljósi þeirrar reynslu sem fengist hefur var ákveðið að reisa í vetur nýtt umsjónarmannshús við innkeyrsluna á svæðið og hafa undir því stóran kjallara sem rúmaði tækjabúnað og þann varabúnað sem þarf fyrir orlofshúsin í Árnessýslu. Þá væri hægt að rýma umsjónarmannsíbúðina í stóra húsinu og geymslurnar. Félagsmenn sem hafa haft húsið í leigu hafa kvartaði undan því að hafa umsjónarmann inn á sér. Umsjónarmenn hafa svo kvartað undan því hversu hljóðbært húsið sé og hafa oft frekar kosið að gista á tjaldsvæðinu um helgar. Með tilkomu nýja hússins er hægt að rýma geymslurnar í stóra húsinu og stækka þá íbúðina og gera hana skemmtilegri og leigja hana út með húsinu. Þar sem geymslurnar eru aðskildar í kjallaranum verður hægt að hafa nýja umsjónarmannshúsið í helgarleigu yfir veturinn og var það tekið í notkun um síðustu páska.

Með aukinni notkun húsanna á Apavatnssvæðinu kom í ljós að heita vatnið var ekki nægjanlegt og við fengum ekki allt það vatn sem við vorum að greiða fyrir. Seljandinn stækkaði því heimæðina á síðasta ári og stækkaði dælurnar. Með tilkomu tjaldsvæðisins kom það fyrir nokkrum sinnum á síðasta sumri að kalda vatnið þraut. Kalda vatnið er tekið úr borholu á svæðinu og með botndælu. Við höfum kannað hvort hægt sé að auka afköst vatnsveitunnar og talið er að það séu ekki hægt að gera ráð fyrir því. Skammt frá svæðinu er lind sem við höfum látið taka sýni úr og hafa þau reynst góð. Nú standa yfir samningar við bóndann um lindina og með tengingu hennar við kaldavatnskerfið verður nægt vatn á svæðinu auk þess skapast möguleiki til þess að setja upp brunahana. Einnig verða tengdir við kerfið nokkrir aðrir bústaðir sem mun lækka kostnað okkar verulega.

Orlofsjóður FÍS sameinaður orlofskerfi RSÍ
Á síðasta þingi FÍS var samþykkt að sameina orlofseignir félagsins við orlofskerfi RSÍ innan fjögurra ára ef það reyndist báðum aðilum hagkvæmt. Þegar FÍS gekk í RSÍ fengu félagsmenn félagsins aðgang að orlofskerfi RSÍ og var rekstur beggja kerfanna sameinaður. Eins og áður hefur komið fram þurfti að framkvæma umtalsverðar endurbætur á orlofseignum FÍS og hefur orlofsnefnd RSÍ fjármagnað þær framkvæmdir. Félagsmenn FÍS komu inn í orlofskerfi RSÍ og var allur félagsaldur þeirra innan FÍS færður inn í punktakerfið. Sumir félagsmanna FÍS voru á varðbergi gagnvart þessum breytingum, en þær raddir hafa nú þagnað eftir að þeir hafa uppgötvað að þeir voru í raun ekki að láta neitt af hendi þeir hafa áfram fullan aðgang að orlofseignum sínum auk hinna 40 orlofshúsa RSÍ. Nú hefur verið gengið endanlega frá því að eignir orlofssjóðs FÍS hafa verið sameinaðar orlofssjóð RSÍ.

Fyrirhugaðar framkvæmdir í orlofskerfinu
Eins og fram hefur komið hér að framan er áætlað að ljúka endurnýjun stóra hússins við Apavatn næsta vetur. Einnig hefur komið fram aö bæta þarf við kaldavatnsveituna í sumar. Sama má segja um kaldavatnsveituna í Svignaskarði. Síðastliðið sumar var helmingur vegarins niður að Apavatnssvæðinu undirbyggður og verður sá hluti lagður varanlefu slitlagi í sumar og hinn helmingurinn undirbúinn, töluverður hluti þessa kostnaðar eða um 1,5 millj. kr. lendir á okkur sakir þess að verulegur hluti umferðar um veginn er inn á orlofssvæði RSÍ. Í vor verða fellihýsin þrjú sem fara inn í Þórsmörk keypt. Orlofshúsið í Vaglaskógi þarnast málunar og viðgerða, auk þess að endurnýja þarf verulegan hluta húsgagna. Litlu leikhúsin sem sett hafa verið við orlofshúsin hafa reynst ákaflega vinsæl og verður í vor haldið áfram við að bæta við húsum. Næsta vetur þarf að greiða eftirstöðvar kaupverðs húsanna tveggja sem keypt voru á Spáni, auk þess að kaupa þarf búslóð í bæði húsin. Ekki hafa verið teknar ákvarðanir um aðrar framkvæmdir.

Sambandið á rafbúnað til upphitunar á heitum pottum sem var í Snæfoksstaðahúsunum áður en heita vatnið kom þangað. Ofarlega á óskalista er að setja upp heita potta við húsin í Lóninu. Í bátaskýlinu við Apavatn er gufubað, sem er ónýtt. Vangaveltur hafa verið uppi um hvort eigi að endurnýja það og setja þar setustofu og snyrtingar.

Búið er að endurskipuleggja Apavatnssvæðið og gera ráð fyrir fleiri húsum þar. Þar er gert ráð fyrir tveim nýjun 10 húsa hverfum. Ráðgert er að hefja framkvæmdir við annað þeirra á næstu árum. Það hverfi er á vestanverðu nesinu, norðan við núverandi hús. Fyrsta skrefið í þeim framkvæmdum er vegalagning og lagning vatns og skolplagna.

Samstarf við Félag bókagerðarmanna um golfvöll Dalbúa
Uppbygging golfvallar í Miðdal hófst sumarið 1994 með því að Golfklúbbur Dalbúa leigði túnin í Miðdal undir golfvöll. Í Dalbúa eru einstaklingar sem eiga orlofshús við Laugarvatn. Miðdalur er jörð í eigu Félags bókargerðarmanna (FBM) sem er innan við Laugarvatn og er félagið þar með orlofshús auk þess að félagsmenn sjálfir eiga þar fjölda húsa. FBM hafa staðið mjög myndarlega að uppbyggingu orlofssvæðis síns í Miðdal, auk þess að hlúa að eldri byggingum eins og t.d. kirkjunni í Miðdal.

Frá því að orlofssvæði FÍS við Apavatn kom inn í orlofshúsakerfi RSÍ, hafa verið uppi vangaveltur um hvort koma ætti fyrir golfvelli á svæðinu. Hægt er að byggja par þrjú völl með 2 - 3 brautum, austan við skóginn sem umlykur tjaldsvæðið, á svæðinu niður að vatninu. Síðastliðin vetur barst til RSÍ erindi frá golfklúbbnum Dalbúa. Klúbburinn var langt kominn með uppbyggingu 9 holu vallar. Eftir að hafa skoðað málið ákvað miðstjórn í samráði við stjórn golfklúbbs RSÍ, að það væri betra að hafa aðgang að 9 holu velli í stuttri fjarlægð frá Apavatni og kæmi mun fleiri félögum RSÍ til góða. Völlurinn er nálægt því að vera mitt á milli Apavatns og orlofssvæðis RSÍ í Brekkuskógi. Þetta er mun hagkvæmara en að byggja upp smávöll við Apavatn, auk þess eru flatir jafndýrar hvort sem um er að ræða stóran eða lítinn völl og kalla á jafnmikla umsjón.

Seinni hluta síðasta sumars var lokið við uppbyggingu vallarins. RSÍ fjármagnaði gerð rúmlega þriggja flatna. Í stað þess fá allir félagsmenn RSÍ aðgang að vellinum fyrir hálft daggjald, 500 kr. Einnig greiðir RSÍ nokkur félagsgjöld og fær þá ákveðinn fjölda sumarkorta sem verða nýtt fyrir félaga okkar sem dvelja í orlofshúsum í grenndinni.

Bygging golfskála var klúbbnum erfið. Stjórn Dalbúa leitað því til RSÍ og Félags bókagerðarmanna í haust um að þessir aðilar kæmu inn í klúbbinn og tækju þátt í því að koma rekstrinum í jafnvægi. Niðurstaðan varð sú að myndað var eignarhaldsfélag um skálann þar sem FBM og RSÍ eiga hvort um sig 45% en Dalbúi á 10%. Eignarhaldsfélagið tók síðan lán og gerði upp allar skuldir klúbbsins, en það verður síðan greitt niður með leigutekjum frá Dalbúa.

Í framhaldi af þessum viðræðum hafa komið fram hugmyndir um að kanna hvort frekara samstarf geti verið aðilum hagstætt, t.d. samrekstur sláttuvéla og sameiginlegir starfsmenn að einhverju leyti. Samstarfið við uppbyggingu vallarins hefur verið mjög gott og báðum aðilum hagstætt, enda er stutt á milli þessara orlofsvæða. Ástæða er að geta þess að RSÍ og FBM eiga mjög mikið samstarf á vettvangi starfsmenntamála í sameiginlegum rekstri Margmiðlunarskólans og hefur uppvöxtur hans frá því samstarfið hófst verið ævintýri líkast.

Spennugolf 2000
7. spennugolfmót RSÍ 2000 fór fram á Jaðarsvelli Akureyri 2. júní. Mikill áhugi var á mótinu að venju og fylltist 46 sæta flugvél Flugfélags Íslands á svipstundu, margir óku því norður auk þess að margir félagsmenn búsettir fyrir norðan komu á mótið, alls skráðu 64 sig á mótið. Mörg vegleg verðlaun voru veitt sem velunnarar mótsins höfðu gefið.Veðrið var ekki eins og best verður á kosið nokkuð kalt en stillt veður, en þátttakendur létu það ekki á sig fá og skemmtu sér konunglega.

Eftir mörg góð og miður góð högg voru úrslit ljós. Í keppni án forgjafar urðu úrslit eftirfarandi: 1. Guðbjörn Ólafsson 78 högg. 2. Arnar Sigurbjörnsson 84 högg og 3. Þórhallur Pálsson 86 högg

Í keppni með forgjöf var um mikla spennu að ræða eins og vera ber í spennugolfi en úrslit þar urðu eftirfarandi: 1. Ragnar Ingólfsson 69 högg, 2. Guðlaugur R. Hilmarsson 69 högg og 3. Sigurður R. Þorkelsson 70 högg

Ragnar telst sigurvegari þar sem hann hefur betra skor á seinni níu holunum.

Nýtniverðlaunin að þessu sinni hlaut Hanni Fossdalsá. Þá voru nokkur aukaverðlaun veitt eins og vanalega. Lengsta upphafshögg á 3ju braut átti Sigurður H. Hauksson, næstur holu í upphafshöggi á 6 braut var Guðbjörn Ólafsson 1,13me, á 14 braut var Sigurður H. Hauksson 4,15me og á 18 braut var Þórhallur Pálsson 1,56me frá holu.

Svona glæsilegt mót verður ekki haldið nema með góðum stuðningi frá velunnurum okkar en mörg fyrirtæki tengd rafiðnaði veittu okkur mikinn stuðning.

Golfnefnd RSÍ mun halda næsta mót þ.e. SPENNUGOLF 2001 að Flúðum á Selsvelli 8. júní nk. Einnig er rætt um að halda mót á golfvelli Dalbúans í Miðdal við Laugarvatn fyrir háforgjafarmenn og byrjendur þ.e. ef veður og vallarskilyrði leyfa, það mót yrði áður en stóra mótið eða síðast í maí, ef af þessu móti verður þá verður það auglýst.

Það má til gamans geta þess að fyrsta SPENNUGOLFMÓTIÐ var haldið á Flúðum, sem þá var bara 9 holu völlur, árið 1994 og mættu til leiks 22 kylfingar en síðan þá hafa 139 kylfingar komið til leiks. Aðeins 4 kylfingar hafa mætt á öll þessi 7 mót, þeir eru: Einar Hafsteinsson, Gísli Ögmundsson, Sveinbjörn Guðjónsson og Stefán Ó. Guðmundsson

Ákveðið hefur verið að halda námskeið í vor og fá golfkennara til að til að taka byrjendur í golfíþróttinni innan RSÍ á námskeið í golfi og reglum þess. Reiknað er með að hver hópur samanstandi af 8 einstaklingum og að kennslan fari fram á Reykjavíkursvæðinu.

Í golfnefnd RSÍ eru Garðar Árnason, Guðbjörn Ólafsson, Magnús Jaroslav Magnússon og Víðir Tómasson. Með þeim starfa Helgi R. Gunnarsson, Stefán Ó. Guðmundsson og Jón Árni Rúnarsson. Starfsmenn mótsins voru Þór Ottesen, Ísleifur Tómasson og Sæmundur Hrólfsson. Formenn RSÍ og RFN afhentu verðlaun.

KJARAMÁLIN

Kjaramálaráðstefna
Á síðasta ári voru flestir kjarasamningar RSÍ endurnýjaðir og byrjun þessa árs er verið að ljúka endurnýjun þeirra kjarasamninga sem eftir voru. Sambandið gerði kjarasamninga við tvo nýja aðila, þ.e. Landsímann vegna félagsmanna FÍS og við Launanefnd sveitarfélaganna vegna starfsmanna Norðurorku, en reiknað er með að sá samningur verði notaður af bæjarveitum víðsvegar um landið.

Á síðasta samningstímabili hækkuðu heildarmánaðarlaun innan sambandsins að meðaltali um tæplega 38% og eru nú um 260 þús. Meðaldaglaun hækkuðu um 40% og eru nú að meðaltali rúmlega 160 þús. kr. RSÍ var þátttakandi í gerð þjóðarsáttarsamninganna, eða skynsemisleiðarinnar hans Ásmundar Stefánssonar eins og hún er oft nefnd, og hefur fylgt þeirri stefnu síðan. Á kjaramálaráðstefnu RSÍ, sem haldin var haustið 1996 við upphaf undirbúnings síðustu kjarasamninga var samþykkt að stefna að áframhaldandi stöðugleika og stefna að gerð kjarasamninga sem sköpuðu möguleika til aukins kaupmáttar.

Í upphafi viðræðna síðasta vetur var að venju haldin kjaramálaráðstefna RSÍ, þar kom m.a. fram að kjarasamningar til lengri tíma, t.d. 2ja ára, séu frekar til þess fallnir að stuðla að stöðugleika og stígandi kaupmætti, en stuttir samningar. Ráðstefnan vildi ekki hafa forgöngu um að þjóðfélagið færi á taugum og lenti í niðursveiflu á ímynduðum forsendum. Með sameiginlegu átaki á að vera hægt að jafna efnahagssveiflur og setja markið áfram á "Stígandi lukku" eins og RSÍ hafði forgöngu um við gerð síðustu kjarasamninga. Mörg teikn eru á lofti um að ekki verði hægt að ná jafnmikilli kaupmáttaraukningu næstu ár, eins og tókst á yfirstandandi samningstímabili. En ráðstefnan vildi að RSÍ tæki þátt í því, að verja þann árangur sem náðst hefur og telur að hægt sé með réttum aðgerðum að halda áfram að auka kaupmáttinn í stað þess að yfirkeyra efnahagskerfið, sem leiði til þess að kaupmáttur minnki.

Helstu atriði sem ákveðið var að leggja áherslu á í komandi kjarasamningum :

Sérstaka hækkun lægstu launa.

Sérstaka hækkun launa iðnnema.

Hækkun lágmarkslauna í stærri framkvæmdum.

Opnari og sveigjanlegri launakerfi

Opnun á launalið samnings ef efnahagsforsendur fara úr skorðum.

Lengingu orlofs.

Hækkun trygginga og betri veikindarétt

Betri skilgreiningar á hvíldartíma og frítöku

Lengingu útkalla, við náðum því að verulegu leyti, þ.e. í 4 tíma að nóttu og um helgar

Greiðslur fyrir truflun í frítíma.

Hækkun greiðslna í lífeyrissjóð og í séreignarsjóð.

Ákvörðunarrétt starfsmanns um heimferð sé hann að störfum innan ákveðinnar fjarlægðar frá heimili.

Hækkun orlofs- og desemberuppbótar.

Breytingu á bakvaktarálögum.

RSÍ ætti að taka þátt í samráði ASÍ félaga gagnvart stjórnvöldum. Eftirfarandi mál voru nefnd : Hækkun skattleysismarka og tekjutengingar barnabóta. Einnig fjölskyldumál og réttindakerfi foreldra eins og fæðingar- og foreldraorlof.

Kjarasamningur RSÍ-SART/SA, útdráttur helstu atriða :

Þann 24. marz var undirritaður nýr kjarasamningur fyrir almenna markaðinn. Samningstíminn er 4 ár, en hægt er að segja samningnum upp á árinu 2003, þannig að hann verði til 3ja ára.

Upphafslaunahækkun er 3,9% og svo um 3% á hverju ári. Nefnd á vegum ASÍ og SA skoðar árlega breytingar á vinnumarkaði og efnahagsástandi og ákvarðar hvort meiri launabreytingar eigi rétt á sér eða hvort launalið samningsins sé sagt upp. Nefnd á vegum RSÍ og SART mun endurskoða launatöfluna í samræmi við niðurstöður Kjararannsóknar um launaþróun á vinnumarkaði eins og gert var á síðasta samningstímabili, þá var bætt við kerfið tveim töxtum.

Við undirskrift hækka lágmarkslaun í rafiðnaði um tæp 13% og verða kr. 90.000. Lágmarkslaun rafiðnaðarmanna með sveinspróf hækka úr taxta 5 í taxta 6 eða um 10% og verða kr. 117.861. Lágmarkslaun rafiðnaðarmanna sem bera tæknilega ábyrgð og geta starfað sjálfstætt er 10. taxti og verða kr. 148.764. Þetta er nýtt ákvæði sem á að tryggja að vanir rafiðnaðarmenn séu ekki á lægri launum en 10. taxta og á að skila því launaskriði sem hefur verið á suðvesturhorninu út á landsbyggðina. Lágmarkslaun nema hækka um 30% og verða kr. 73.095 og fara í kr. 90.000 síðasta árið. Lágmarkslaun í virkjanaframkvæmdum hækka um 26% og verða kr. 145.000. Í bókun kemur fram að SA telji að launakerfi RSÍ og SART séu lágmarkslaun á almennum vinnumarkaði rafiðnaðarmanna.

Desemberuppbót hækkar í kr. 31.000 á samningstímanum. Desemberuppbót nema fer í kr. 19.700. Orlofsuppbót hækkar í kr. 10.000 og hjá nemum fer hún í kr. 7.700.

Á samningstímanum munu atvinnurekendur greiða 2% í séreignasjóð gegn jafnháu framlagi rafiðnaðarmanna. Útkall um nætur og um helgar lengist um eina klst. Inn kemur nýtt ákvæði sem kveður á um að verði rafiðnaðarmenn fyrir truflunum í frítíma beri þeim endurgjald.

Öll ákvæði um hvíldartíma og frítökurétt eru mun skýrari og betri og er fallist á sjónarmið RSÍ um ágalla fyrri samnings. Hér er átt við skýringar um hvíldartíma og að yfirvinnulaun verði tvöföld fari hvíld niður fyrir 8 klst.

Réttur rafiðnaðarmanna til fullra launa í veikindum tvöfaldast og getur ekki fallið niður fyrir 10 daga eftir 3 starfsár og ekki niður fyrir mánuð eftir 5 ár. Hér er um verulega bót frá fyrrverandi ákvæðum þar sem starfsmenn gátu fallið niður í engan rétt fyrsta mánuð ef skipt var um vinnustað og svo 2 veikindadaga eftir það. Orlof vegna veikinda barna lengist um 3 daga eða í 10 daga eftir eins árs starf.

Eftir áratuga baráttu um veikindarétt í orlofi erlendis tókst loks að fá veikindi í orlofi á evrópska efnahagssvæðinu viðurkennd. Slysatryggingar hækka umtalsvert, t.d. við varanlega örorku fara þær úr 5 millj. kr. í 12 millj. kr. Orlof lengist í 28 daga eftir 10 ára starf og ávinnsla á hærri orlofsrétt styttist verulega ef skipt er um vinnustað.

Nýr ákvæðisvinnusamningur var undirritaður og gerðar breytingar á honum til samræmis við þær breytingar sem urðu þegar skrifstofu Ákvæðisvinnunefndar var lokað. Einingakerfið verður endurskoðað og á þeirri vinnu að vera lokið fyrir 1. des. næstk. Ákvæðisvinnutímaeiningin hækkar um 2% aukalega nú og um önnur 2% um næstu áramót.

Fullnægi atvinnurekandi ákvæðum um að útvega hlífðarfatnað. Ber hann kostnað vegna þess. Útborgun launa síðasta virkan dag í mánuði. Það olli vandræðum ef mánuður byrjaði á frídögum að útborgun sé fyrsta virkan dag í mánuði, þessu er breytt núna. Endurgjald ef fyrirfram skipulagðri vinnu er aflýst tvöfaldast. Viðurkenndur er ákvörðunarréttur starfsmanna um heimferð í vinnutíma ef þeir eru að störfum í innan við klst. fjarlægð frá heimili sínu.

Þeir rafiðnaðarmenn sem starfa á þessum kjarasamningi fengu á síðasta samningstímabili um 38% launahækkun, þar af var 13% umsamin launahækkun og 25% er til komin vegna launaskriðs, sem endurspeglar að stærstum hluta atvinnuástand og svo aukna starfsmenntun í gegnum öflugt starfsmenntakerfi rafiðnaðarmanna og svo, stjórnunar- og starfsaldursálög. Atvinnuástand hefur verið með hreinum ólíkindum hjá rafiðnaðarmönnum. Auglýsingar eftir okkar fólki birtast mörgum sinnum í viku og fjöldi fyrirtækja hefur ekki fengið svör. Hér má t.d. benda á álverksmiðjurnar sem hafa verið að leita eftir rafiðnaðarmönnum mánuðum saman og eru að bjóða laun sem menn líta ekki við, þær fá ekki eina einustu umsókn.

Ákveðið að hætta birtingu launatöflu
Óánægja rafvirkja á almennum vinnumarkaði með leiðbeinandi launatöflu RSÍ - SART farið mjög hratt vaxandi. Tilvist töflunar virðist vera mörgum rafverktakafyrirtækjum tilefni til þess að halda launum rafvirkja niðri. Steininn tók úr þegar kjararannsóknarnefnd birti launakönnun fyrir 3. ársfjórðung 2000. Þar eru meðallaun iðnaðarmanna kr. 207.243, en meðallaun rafvirkja eru sögð vera kr.181.400. Úrtakið er óeðlilega fámennt og margt sem bendir til þess að niðurstaðan sé ekki marktæk. Starfsmenn RSÍ hafa ítrekað en árangurslaust reynt að fá SART til þess færa launatöfluna til samræmis við það sem gengur og gerist á vinnumarkaði rafiðnaðarmanna.

Á miðstjórnarfundi RSÍ í marz 2001 var harðlega átalið að starfsmenn hefðu sent út óbreytta töflu. Töldu miðstjórnarmenn að betra hefði verið að slíta samstarfinu við SART um launatöfluna og senda einungis út hver væru umsamin lágmarkslaun í rafiðnaði. Um það hefði verið samið milli RSÍ og SART, að taflan myndi ætíð endurspegla þau laun sem væru á almennum markaði. Samstarf RSÍ við SART hefði ætíð verið mikið og farsælt á mörgum sviðum og vildu miðstjórnarmenn ógjarnan slíta samstarfi um birtingu leiðbeinandi launatöflu, en ef SART fengist ekki til þess að endurskoða töfluna, þá væri ekki annað að gera en að slíta samstarfinu og birta í Kaupskránni einungis lágmarkslaun.

Eftir nokkra fundi RSÍ og SART um málið náðist ekki samkomulag og því mun verða hætt við að birta Launatöflu SART og RSÍ í Kaupskrá RSÍ. Í stað launatöflunnar verður birt lágmarkslaun, þ.e. taxti 1 fyrir tæknifólk, taxti 6 fyrir rafiðnaðarmenn með sveinspróf og taxti 10 fyrir rafiðnaðarmenn sem geta starfað sjálfstætt að verkefnum. RSÍ setti fram kröfur um að bæta við töxtum í töfluna í samræmi við þá þróun sem hefur orðið á vinnumarkaði rafiðnaðarmanna. SART hafnaði því og var svo komið að efsti launaflokkur launatöflunnar er nokkuð undir meðallaunum rafiðnaðarmanna. RSÍ hélt því fram að það væri út í hött að vera birta launatöflu sem ekki endurspeglaði þau laun sem verið væri að greiða. Einnig kom fram að skrifstofa RSÍ hefur að beiðni margra fyrirtækja reiknað út launataxta fyrir ofan töfluna.

RSÍ mun eftir sem áður, birta á heimasíðunni niðurstöður RSÍ og Kjararannsóknar um launaþróun og auk þess launatöflu sem væri endurskoðuð a.m.k 2svar ári og byggð á eins traustum grunni og frekast væri kostur m.a. launakönnunum sambandsins, sem hefðu ætíð reynst mjög réttar og ekki verið gagnrýndar af vinnuveitendum heldur hið gagnstæða. Sú launatafla myndi nú innihalda taxta 14 sem er kr. 204.562 sem mánaðardaglaun.

Samningur við Íslenzka útvarpsfélagið.
28. marz var nýgerður kjarasamningur RSÍ og ÍÚ og Sýn borinn upp á fundi félagsmanna sem starfa á samningnum. Samningurinn var samþykktur með 58% atkvæða.
Samningurinn er til þriggja ára með sömu hækkunum og eru í nýgerðum kjarasamningi RSÍ á almennum markaði. Lágmarkslaun verða kr. 117 þús eða þau sömu og eru hjá rafiðnaðarmönnum með sveinspróf í nýgerðum samningi og verða í lok samningstímabilsins kr. 132 þús. Launataxtar voru lagfærðir til samræmis við það launaskrið, sem orðið hefur í sambærilegum störfum á almennum markaði auk nokkurra annarra atriða.

Helstu atriði nýs kjarasamnings RSÍ og fjármálaráðuneytis.
Nýtt launakerfi með launatöflu frá kr. 90 þús. kr. í daglaun á mánuði til kr. 240.437. Í neðsta taxta eru nemar á starfþjálfunarstigi og er það sama og í nýgerðum samning á almenna markaðnum, hér er um umtalsverða hækkun að ræða fyrir nema.

A rammi almenn rafiðnaðarstörf frá 95.523 kr að 156.130 kr.

B rammi meirihluti rafiðnaðarmanna. frá 114.209 kr. til 189.472 kr.

C rammi deildarstjórn og faglegri ábyrgð. frá 130.585 kr. til 240.437 kr.

Í grein 2.4.1. er ákvæði um að tímakaup í dagvinnu sé 0,615% af mánaðarlaunum. Þetta þýðir 0,5% til 6,6% hækkun á vaktaálagi.

Desemberuppbót hækkar um 7% eða úr 31.900 í 34.000 og fer í 37.000. Á almennum markaði eru sambærilegar tölur 28.200 og fara i 31.000.

Útborgun launa breytist úr vikukaupi í mánaðarlaun, fyrir það er greitt kr. 40.000 og 15 yfirvinnutímar á nýju laununum sem þýðir um 63.000 kr. hjá flestum

Nýr og mun betri tryggingarkafli, t.d. ákvæði um bætur til 18 – 25 ára barna sem eru í langskólanámi. Margfeldi vegna varanlegrar örorku fjórfalt í stað þrefalt fer í 15 millj. en er 12 millj á almennum markaði

Samningurinn var kynntur á mjög fjölmennum fundi og stóð síðan kjörfundur í tvo daga. Þegar kjörfundi lauk höfðu 81 kosið eða 73%. Á kjörskrá voru 113. Já sögðu 47 eða 58%, nei sögðu 33 eða 41% og ógildir voru 1 eða 1%

Nýr kjarasamningur við Reykjavíkurborg.
Nýtt launakerfi með launatöflu frá kr. 114.747 – 268.104 þús. kr. í daglaun á mánuði. Í taxtar nemar á starfþjálfunarstigi og er það sama og í nýgerðum samning á almenna markaðnum, eða 76.764 – 101.864, hér er um umtalsverða hækkun að ræða fyrir nema.

Á sviði Tækna og almennra rafiðnaðarmanna kr. 114.747 – 133.169.

Á sviði Heimtaugamanna, mælingarmanna og tölvutækna kr. 127.351 – 150.012.

Á sviði Vaktmanna, flokksstjóra og eftirlitsmanna kr. 127.351- 154.546.

Á sviði Stjórnenda kr. 131.200 – 164.030

Í grein 2.4.1. er ákvæði um að tímakaup í dagvinnu sé 0,615% af mánaðarlaunum. Þetta þýðir 0,5% til 6,6% hækkun á vaktaálagi.

Desemberuppbót hækkar um 17% eða úr 29.257 í 34.000 og fer í 37.000. Á almennum markaði eru sambærilegar tölur 28.200 og fara í 31.000.

Ákvæði um ástæðu uppsagnar sem ekki eru í öðrum samningum en verkalýðshreyfingin hafi sótt ákaft

Flokksstjórar fái verkstjórnarálag þegar þeir vinna sem slíkir.

Starfsmaður sem tekinn er úr bónus og settur í annað heldur meðalbónus

Skilvirkni bónuskerfi skoðað.

Samningstími þessara samninga er svipað og á almennum samning. Auk þess eru atriði sem eru eins og í almenna samningnum eins og veikindaorlof vegna barna og séreignarsjóður.

Að loknum kynningarfundi var opnaður kjörfundur sem stóð í einn sólarhring. Þegar honum lauk þá höfðu 68,5% greitt atkvæði. Já sögðu 43 eða 73% og nei sögðu 17 eða 27%.

Samningur sýningarmanna endurnýjaður.
Samningar sýningarmanna eru með nokkuð sérstöku sniði, að því leyti að kvikmyndahúsin eru ekki í SA. Þannig að við erum stundum að gera einn sameiginlegan kjarasamning og stundum marga vinnustaðasamninga. Nú var gerður einn samningur við SAM-bíóin og svo annar við hin húsin. Þessir samningar eru mjög svipaðir. Samið var um nýja launataxta. Samningurinn nær til 1. marz 2003 og laun hækka á samningstímanum um 4% 1.1. 2001, 3% 1.1. 2002 og 1,2% 1.1. 2003. Desemberuppbót er kr. 34.000 en orlofsuppbót eins og á almenna samningnum. Störf sýningarmanna eru endurskilgreind og starfssvið víðtækara. Samið var um nýja útfærslu á neysluhléum vegna lengds sýningartíma. Sérstakt álag er verið er að sýna eldri myndir á kvikmyndahátíðum.

Virkjanasamningur kolfelldur.
Á fundi í Vatnsfelli þann 24.5. var nýr virkjanasamningur borinn upp. Á fundinum voru 130 starfsmenn af svæðinu. Einungis 3 rafiðnaðarmenn voru á fundinum, en eins menn vita þá fjölgar rafiðnaðarmönnum ekki fyrr en á síðustu verkstigum. Eins og margoft hefur komið fram á heimasíðu RSÍ, þá hafði sambandið engan áhuga á því að vera aðili að þessum kjarasamning. Íslenskir rafiðnaðarmenn eru á langflestir á persónubundnum fyrirtækjasamningum sem eru bundnir almennum kjarasamning, eini tilgangur virkjanasamnings fyrir RSÍ er gildi hans sem lágmörk fyrir erlend fyrirtæki. Við endurnýjun almenna samnings okkar í vetur voru sett inn lágmarkslaun við stærri framkvæmdir sem voru mun hærri en í virkjanasamningnum. Hinn nýji virkjanasamningur var lítið breyttur, lágmarkslaun höfðu verið hækkuð til samræmis við almennan samning RSÍ eða um tæp 30%. Þrátt fyrir ítrekaðar tilraunir fengust samningamenn SA ekki til þess að vera með nema þennan eina lágmarksflokk fyrir iðnaðarmenn og reyndu nokkuð lengi að brjóta nýgerðan kjarasamning RSÍ með því að setja desember- og orlofsuppbót inn í þennan eina lágmarkstaxta. Neðsti launflokkur verkamanna skorinn neðan af og mörkum breytt á milli launaflokka, ferðapeningar og tryggingar hækkaðar.

Á svæðinu var mikil óánægja með vaktir og ferðatíma og eins vildu menn fá staðaruppbót. Hún var á sínum tíma felld inn í launataxta. Í vetur var í fyrsta skipti unnið allan veturinn og er óhætt að segja að sú reynsla gefi fyllilega tilefni til þess hvort það sé leggjandi á menn og þá verður að endurskoða lengd úthalda yfir háveturinn. Þessum atriðum ásamt fleirum voru samninganefndarmenn launamanna árangurslaust búnir að reyna að koma á framfæri við samningamenn SA. Þegar það var orðið ljóst að ekki væri lengra komist með þá, var samningurinn undirritaður og borinn undir fólkið og niðurstaðan staðfesti einvörðungu það sem samningamenn höfðu haldið fram.

Aftur var sest að virkjanasamningnum og þann 5. júní var viðbót við samninginn undirrituð. Hún felur í sér staðaruppbót, sem er um fjórðungi hærri að vetri. Einnig er hluti tækja- og járnamanna fluttir upp um launaflokk. Samningurinn var samþykktur með þessum breytingum.

Samningur við Eimskip.
RSÍ er með sérsamning við Eimskip vegna rafiðnaðarmanna sem starfa við höfnina, sjá um kæligáma, rafmagnslyftarana og kranana. Þessi samningur er kálfur við almenna samninginn og tekur á vinnutíma, vöktum og launum. Þessi samningur var endurnýjaður þann 31. marz.

Samningur RSÍ og Leikfélags Reykjavíkur

Rafiðnaðarmenn hjá LR voru lengi vel á kjörum sem voru tengd við samning RSÍ við Reykjavíkurborg. Fyrir nokkrum árum var gerður sjálfstæður samningur við LR. Í vor var sá samningur endurnýjaður, umtalsverðar breytingar voru gerðar á launatöflu í samræmi við aðra fastlaunasamninga sem við vorum búnir að gera.

Samningur við Áburðarverksmiðjna.
Áburðarverksmiðjan var seld fyrir nokkru. Eftir að hún komst í einkaeign hefur fastráðnum rafiðnaðarmönnum fækkað umtalsvert og verksmiðjan nýtir frekar aðkeypta vinnu rafverktakfyritækja. Svo var komið í vor að einungis einn rafiðnaðarmaður var að störfum á Áburðarverksmiðjusamningnum. Þegar undirbúningur hófst að endurnýjun samningsins kom í ljós að iðnaðarmennirnir vildu ekki vera í samfloti með verzlunarmönnunum og verkafólkinu. Launakjör þeirra samkvæmt samningnum voru komin verulega úr takt við það sem tíðkaðist á vinnumarkaðnum. Í hvert skipti sem þeir hefðu reynt að ná fram einhverjum leiðréttingum hefðu þeir þurft að standa í jafnvel harðari slag við félaga sína í samninganefndinni en við verksmiðjuna. Niðurstaðan varð sú að okkar maður í verksmiðjunni samdi sjálfur um sín launakjör og við erum ekki lengur þátttakendur í Áburðarverksmiðjusamningnum.

Rafiðnaðarmenn á Keflavíkurflugvelli.
Það starfa nálægt 50 rafiðnaðarmenn hjá Varnarliðinu. Þeir skipast í tvo jafnstóra hópa. Annar er rafeindavirkjar sem starfa við flugstjórnartækin, hinn eru rafvirkjar sem starfa að viðhaldi á rafbúnaði á vellinum. Þeirra launakjör eru ákvörðuð af Kaupskrárnefnd. Í bandarískum lögum er það svo að herinn má ekki gera kjarasamninga og eiga launakjör hjá honum að taka mið af samsvarandi hópum á vinnumarkaði utan vallarsvæða. Allir hópar á vellinum hafa því svokallaðan viðmiðunarhóp og hafa launakjör okkar fólks tekið mið af Áburðarverksmiðjusamningnum.

Fyrir nálægt tveim árum fóru rafiðnaðarmenn fram á að þeirra viðmið væri flutt yfir á Ísal samninginn, hjá Ísal væri starfsvið rafiðnaðarmanna líkara en í Áburðarverksmiðjunni. Það tók Kaupskrárnefnd nær tvö ár að komast að niðurstöðu, en meirihluti hennar tók loks þá ákvörðun að launakjörin yrðu miðuð við almenna samninginn og laun hækkuð jafnt og meðallaunahækkanir verði á vinnumarkaðnum. Þetta voru rafiðnaðarmönnum á vellinum vonbrigði, þá sérstaklega með tillit til þess að nokkur atriði sem þeir hafa eins og t.d. orlof, desember- og orlofsuppbót og tryggingar eru betri en tíðkast á almenna samningnuum. Í greinargerð meirihlutans kemur fram að rafiðnaðarmenn eigi ekki að missa neitt af þeim kjörum sem þeir þegar hafa. Við höfum því sett fram þá túlkun að ef samið verði um samskonar atriði í almenna samningnum og rafiðnaðarmenn á vellinum þegar hafa, þá beri þeim samsvarandi kjarabót.

Samningur við Félag stórkaupmanna.
FÍS fór fyrir 4 árum fram á að gera sjálfstæðan kjarasamningur við RSÍ. FÍS er ekki í SA. Fram að þeim tíma voru rafiðnaðarmenn í þjónustu fyrirtækja innan FÍS á almenna samningnum. Þá var gerður nýr samningur sem í öllum aðalatriðum var eins og almenni samningurinn. Þegar við vorum búnir að endurnýja almenna samningin, áttum við von á að fljótgert yrði að endurnýja samninginn við FÍS, en það reyndist ekki vera. FÍS lagði áherslu á að samningnum yrði breytt og hann yrði eins og nýr samningur FÍS við VR. Því var algjörlega hafnað að okkar hálfu, það væri töluverð afturför og við vildum þá frekar taka aftur upp almenna samninginn og leggja samninginn við FÍS niður. Í þessu stappi stóð fram á sumar og það var ekki fyrr en 28 júlí sem samkomulag náðist. Samningurinn er eins og áður á sömu nótum og almenni samningurinn. Á þessum samning eru vel liðlega 100 rafiðnaðarmenn.

Nýr kjarasamningur RSÍ við RARIK.
Í nóvember var undirritaður nýr kjarasamningur við RARIK sem gildir til 30. nóvember 2004. Í samningnum er ný launatafla svipuð og sú sem var í kjarasamningum RSÍ við Reykjavíkurborg og Fjármálaráðuneytið í vor. Nefnd á vegum starfsmanna og fyrirtækisins hafa undanfarnar vikur unnið að skilgreiningu starfa og starfsmats. Meðaltalshækkun við innröðun í nýtt kerfi er 18%. Það er ætíð þannig að innröðun í nýtt launakerfi leiðir af sér mismunandi launabreytingar. Hið nýja kerfi er mjög sveigjanlegt og gefur möguleika til þess að bregðast við breytingum, sem verða í launaþróun á vinnumarkaði og kröfum fyrirtækisins vegna breytilegra krafna. Stjórnunarálögur hverfa og verða innan launaflokkakerfisins. Allar breytur í nýrri launatöflu eru 1,5%, þannig að 1,5% er á milli launaflokka niður töfluna, sama má segja um starfsaldurskerfið út hvern launaflokk. Eftir 6 mán. kemur hækkun sem er 2x 1,5% sama eftir 1 ár. En 1 x 1,5% eftir 3ár, 5 ár , 7 ár og 10 ár. Þannig er áunnin hækkun vegna starfsaldur brattari í byrjun eins og var.

Kaupauki hækkar úr 2,5% í 4%.

Upphafshækkun er því að meðaltali 18% og er afturvirk frá 1.10 2000. Það er tilkomið vegna þess að fyrirtækið gaf út þá yfirlýsingu við upphaf viðræðna, að samningurinn myndi gilda frá 1.10. 2000 ef niðurstaða næðist með friðsamlegum hætti. Fyrirtækið vildi með þessu tryggja að nefndin, sem endurskoðaði launakerfið, gæti unnið starf sitt án utanaðkomandi þrýstings.

Þann 1.1.2001 hækkuðu laun svo um 1,5% og verður því launahækkun við gildistöku samningsins verði hann samþykktur að meðaltali um 19.77%

Umsamdar launahækkanir verða með svipuðum hætti og í öðrum kjarasamningum, þann 1.1 2002 hækka laun um 3% og þann 1.1. 2003 um 3% og svo þann 1.1. 2004 um 2,75%.

Laun í hinu nýja kerfi verða endurskoðuð í síðasta lagi í fyrir 1. maí 2001 um 1,5% að meðaltali, þ.e. að meðaltali upp um einn launaflokk. Heildarhækkun á samningstímanum verður því að meðaltali a.m.k. 32,5%

Önnur helstu atriði í samningnum eru :

Endurskoðun á útköllum og hvíldartíma ákvæðum.

Ákvæði um veikindi í orlofi og veikindi barna breytast

Tryggingarkafli samningsins var endurskoðaður.

Samskonar ákvæði eru í samningnum um séreignarsjóð og samið hefur verið um í öðrum kjarasamningum á þessu ári.

Endurskoðunarákvæði eru í samningnum í ársbyrjun 2002 og 2003.

Ástæða er að geta þess að við undirbúning kröfugerðar var ákveðið að sækja sérstaklega fram í hækkun launa og en láta sem minnst fara í aukaatriði.

Samningar við Landsímann.
RSÍ hefur verið með kjarasamning við Landsímann síðasta samningstímabil, áður voru starfsmenn símans á kjarasamning RSÍ við Fjármálaráðuneytið.

Eftir að FÍS gekk í RSÍ var það ætlun miðstjórnar að sameina samninga FÍS og RSÍ við Símann. Þegar viðræður hófust kom í ljós að Síminn taldi alla vankanta á því að það væri hægt. Þá helst vegna þess að kjarasamningur RSÍ og Símans hefði verið gerður af SA en það væri ekki upp nein áform af hálfu Símans að fara með það starfsfólk sem væri í FÍS inn í SA.

Því voru gerðir tveir kjarasamningar við Símann. Eldri samningur RSÍ er vegna símsmiða, rafvirkja og rafeindavirkja. Við einkavæðingu í símamálum hefur umhverfi Landssímans breyst og hann kominn í samkeppni við önnur símafyrirtæki um tæknifólk. Þetta hefur leitt til þess að launakerfi hjá Landssímanum hafa á undaförnum árum tekið umtalsverðum breytingum til samræmis við það sem tíðkast á almennum markaði. Nýr kjarasamningur RSÍ og Landssímans tekur mið af þessum breytingum og er gamla launakerfinu hent og í stað þess samið um nýtt og sveigjanlegt launakerfi. Upphafs- og áfangalaunahækkanir eru svipaðar og í öðrum kjarasamningum sem RSÍ gerði. Sama má segja um önnur almenn atriði.

Nýr samningur FÍS/RSÍ og Landssímans h/f. var undirritaður. Í honum var nýtt og opið launakerfi, svipað og er í samningum RSÍ m.a. við Fjármálaráðuneytið og RARIK. Lágmarkslaun voru hækkuð umtalsvert og talsímaverðir fengu sérstaka hækkun um nokkra launaflokka. Töluverðar breytingar voru gerðar á texta hins eldri kjarasamnings FÍS og Símans.

Samningarnir voru kynntir á fundum í Reykjavík sem voru tengdir með fjarfundabúnaði við nokkra staði á landsbyggðinni. Auk þess voru haldnir nokkrir minni fundir á landsbyggðinni.

Samningarnir voru báðir afgreiddir í póstakvæðagreiðslum og samþykktir með afgerandi hætti.

Samningur við Landsvirkjun.
Í dag var undirritaður nýr kjarasamningur við Landsvirkjun. Samningurinn gildir til 31. des. 2004 og tekur 3% hækkun 1.1. ár hvert. Samið var um nýtt og opið launakerfi eins og við höfum verið að gera í öðrum samningum. Inn kemur 10% upphafslaunahækkun, en einnig var samið um að fara í gegnum starfsmat og á því að vera lokið og innröðun í nýja launakerfið í síðasta lagi 1. maí 2001 sem á að skila að meðaltali um 6% launahækkun. Tryggingarkafli samningsins verður endurskoðaður og ákvæði um starfslok. Inn í samninginn eru sett ný ákvæði um hvíldartíma og frítökurétt og breytingar á nokkrum atriðum samningsins. Samningurinn var samþykktur með afgerandi hætti í póstatkvæðagreiðslu.

Samningur við Selfossveitur og viðræður við Bæjarveiturnar í Vesmannaeyjum

Samningur RSÍ við Selfossveitur er í öllum meginatriðum eins og samningur sambandsins við RARIK. Að frágengnum RARIK viðræðum var sest að Selfossveitnasamningnum og gerðar samskonar breytingar á honum.

Í framhaldi af því hafa staðið yfir viðræður um að gera samskonar samning við bæjarveiturnar í Vestmannaeyjum, en þær hafa hingað til notað RARIK samninginn.

Samningur við ÍSAL.

Þann 12. janúar var undirritaður nýr kjarasamningur við ÍSAL. Samningurinn er um margt líkur þeim fastlaunasamningum sem við höfum verið að gera, en sker sig þó frá með víðtækum breytingum á bónuskerfum sem geta gefið starfsmönnum góða möguleika á kaupaukum. Samningstími er til 30. nóvember 2004 og áfangahækkanir á samningstímanum þær sömu og annarstaðar.

Við endurnýjun samninga RSÍ höfum við lagt á það sérstaka áherslu við endurnýjun fastlaunasamninga okkar að skera upp launakerfin og opna þau. Með fastlaunakerfi er átt við launaflokkakerfi með fasmótuðum starfsaldurshækkunum og stjórnunarálögum. Í þessum kerfum lenda menn í ákveðinni skúffu og ef þeir hafa viljað fá einhverja breytingu hefur algengt viðkvæði vinnuveitenda verið, að því miður geti þeir ekki hækkað launin þó svo þeir svo gjarnan vildu og afkoma fyrirtækisins gefi tækifæri til þess. “En það er hið blessaða verkalýðsfélag sem bannar mér að hækka launin, það þvingaði mig til þess að gera kjarasamning með þessum skítalaunum!!”.

Við höfum viljað losa vinnuveitendur úr þessari leiðinlegu klemmu með því að opna kerfin og lyfta þakinu af launakerfunum. Þetta var eitt af sérstökum áhugamálum okkar gagnvart ÍSAL, við náðum ekki eins langt og við hefðum viljað en núna síðustu dagana náðist þó ágætur áfangi. Annað sérstakt áhugamál okkar var að útkljá langvinnar deilur vegna vaktarafvirkja, sem risu upp í hámark eftir alvarlegt vinnuslys vaktarafvirkja. Ákveðin niðurstaða náðist í því máli á síðustu stundu.

Eins og flestir vita þá hefur verið mikil ólga hjá ÍSAL undafarin misseri, málferli tíð og margskonar leiðindi. Gerð þessa samnings tók óvenjulega langan tíma og voru yfir 50 fundir haldnir. Tekist var á um mjög mörg atriði sem hafa valdið deilum og reynt að setja skýrari texta í kjarasamninginn. Kjarasamningur er sáttagjörð milli vinnuveitanda og starfsfólks, sem er gerður til þess að setja báðum aðilum leikreglur. Vitanlega er það öllum aðilum áhugamál að á vinnustaðnum sé sátt og samskipti góð. Væntingar standa til að með þessum nýja samningi takist mönnum að komast upp úr hjólfarinu og ÍSAL verði eftirsóknarverður vinnustaður eins hann var lengi vel.

En þessi samningur var felldur bæði hjá iðnaðarmönnum og verkafólki. Verkstjórn viðræðna var þá falin sáttasemjara. Eftir viðræður í nokkar vikur og gerðar höfðu verið breytingar á bónus- og kaupaukakerfinu voru samningarnir samþykktir í lok febrúar.

Helstu atriði voru að laun hækkuðu frá 1.12. 2000 um tæp 8% og síðan um 3% 1.1. 2001 og um 3% hver áramót til 2003 og 3,25% 2004. Starfsaldurshækkanir eru hraðari, nýtt sveinsprófsálag, umtalsverð hækkun tryggingarbóta, fjölgun launaflokka, hækkun á námskeiðsálagi um 1%. Gæða- og nýtingabónus kemur og gefur að lágmarki 5,5%. Öryggis- og umgengisbónus kemur inn og gefur að lágmarki 6,6%. Inn kemur ábyrgðarálag og lagfæring á kaupaukum. Aukinn réttur til hlutastarfs eftir 55 ára aldur og 28 ára starf hjá Ísal. Auk þess voru mörg atriði skýrð og bókanir gerðar til þess að reyna að koma í veg fyrir þær deilur sem risu á síðasta samningstímabili.

Nýr samningur við Launanefnd sveitarfélaganna.

Undanfarin ár hafa rafiðnaðarmenn hjá mörgum bæjarveitum velt því fyrir sér að ganga úr starfsmannafélögum sveitarfélaganna og yfir í RSÍ. Rafiðnaðarmenn hjá Norðurorku gengu úr Starfsmannafélagi Akureyrarbæjar í fyrra yfir í RSÍ. Í framhaldi af því var farið fram á viðræður við Akureyrarbæ, en þeim var vísað til Launanefndar sveitarfélaganna. Við lögðum fram nýjan kjarasamning við RARIK. Því var algjörlega hafnað af hálfu Launanefndarinnar, en samninganefnd RSÍ sagði útilokað að hún myndi semja um lægri launakjör en þar væru. Þau væru þau sömu og margar aðrar bæjarveitur hefðu samið um. Eftir margra vikna hark endaði með því að rafiðnaðarmenn hjá Norðurorku boðuðu verkfall þann 21. febrúar. Á miðnætti þann 21.2. eða á sama tíma og verkfall hófst, var undirritaður nýr kjarasamningur RSÍ við Launanefnd sveitarfélaganna sem gildir til 30. nóvember n.k. Þetta er fyrsti kjarasamningur RSÍ við Launanefndina, en sambandið hefur undanfarin ár gert samninga beint við nokkur sveitarfélög. Einnig hafa starfsmenn nokkurra bæjarveitna fylgt samningi sambandsins við RARIK. Þessi samningur verður í framtíðinni aðalsamningur sambandsins við sveitarfélögin og er reiknað með að rafiðnaðarmenn hjá mörgum bæjarveitum flytji sig yfir á hann. Það eru starfsmenn Norðurorku sem hafa barist fyrir þessum samningi, þeir voru í Starfsmannafélagi Akureyrarbæjar en sögðu sig úr því og gengu í RSÍ.

Tekist var á um samskonar innröðun í launakerfi og eru í kjarasamningum RSÍ og hefur borið töluvert á milli eins og fram hefur komið. Verulegur áfangi náðist nú í launaleiðréttingum, en nota á samningstímann til þess að endurskoða og samræma laun hjá Norðurorku við önnur orkuveitufyrirtæki. Einnig eru ákvæði í samningnum um viðbrögð og neyðarþjónustu í verkföllum, sem vitanlega giltu ekki nú þar sem ekki var í gildi samningur RSÍ við Launanefndina. Samkomulag náðist nú um að setja að hluta til inn samskonar ákvæði í þennan nýja samning og verða þau ákvæði endurskoðuð á samningstímanum.

Samningar við verksmiðjurnar.
RSÍ er aðili að ásamt öðrum stéttarfélögum kjarasamningum við Sementsverksmiðjuna, Steinullarverksmiðjuna, Kísiliðjuna, Járnblendiverksmiðjuna og Norðurál. Þessir samningar eru í mörgu líkir en launatöflur og bónuskerfi eru þó með ólíkum hætti. Í febrúar 2001 var gegnið frá samningum við Sementsverksmiðjuna, Steinullarverksmiðjuna og Kísiliðjuna. Þessir samningar giltu frá 1. desember og var upphafslaunahækkun um 10% að jafnaði, þetta var gert í formi breytinga á bónusum, færslum á milli launaflokka o.fl. en með mismunandi hætti milli verksmiðja og eins milli hópa. Laun hækka svo um 3% 1.1. 2001 og hækka um 3% í ársbyrjun fram til 2004.

Nokkuð uppnám varð innan forystu RSÍ þegar fréttist að búið væri að ganga frá samning við Kísiliðjuna, það var gert án þess að bera samninginn undir RSÍ á neinu stigi. Þær upplýsingar sem RSÍ voru sendar, sýndu að lágmarkslaun rafiðnaðarmanna voru mun lægri en þau markmið sem við höfðum sett okkur. RSÍ hafnaði að staðfesta samninginn. Því fylgdi einkennileg bréf frá formanni samninganefndarinnar. RSÍ fór fram á fund með SA, sem tók því vel og þar var farið yfir samninginn með þeim. Þá kom fram að gerður hafði verið samningur við rafiðnaðarmennina hjá verksmiðjunni, sem hafði lyft launum þeirra langt umfram það sem samið hafði verið um við aðra og lágmarkslaun þeirra væru mun hærri en fram kæmi í samningnum. Auk þess hefðu rafiðnaðarmenn húsaleigustyrki, sem verksmiðjan hefði orðið að gera við þá til þess að fá þá til starfa við verksmiðjuna. Aðrir hefðu gert kröfu um samskonar styrki en ekki fengið. Á grundvelli þessa þótti mönnum harla einkennilegt, að formaður samninganefndarinnar skyldi ekki hafa leitt okkur í sannleikann en frekar valið þann kost að leggjast í skotgrafirnir, það hefði verið svo auðvellt að komast hjá þessum vandræðum.

Rekstur Járnblendiverksmiðjunar hefur verið mjög erfiður undanfarið. Á þeim forsendum varð sú niðurstaða að framlengja samningnum óbreyttum til haustsins. Þetta var fellt af starfsmönnum.

Árið 1998 var gerður samningur við eigendur Norðuráls til 2004. Á honum voru samskonar launahækkanir og voru þá í öðrum kjarasamningum og ákvæði um að þegar búið væri að endurnýja kjarasamninga um áramótin 2000/2001 ættu aðilar að setjast niður og semja um samskonar breytingar. Þessa dagana standa yfir viðræður og deilt er um hvaða launahækkanir urðu í raun.

Deilur um búsetuskyldu starfsmanna Ratsjárstofnunar.
Í upphafi reksturs Ratsjárstofnunar störfuðu rafiðnaðarmenn jöfnum höndum við allar stöðvar RS, án þess að á þeim hvíldu nein ákvæði um búsetuskyldu. Einungis voru byggð hús á Höfn og allsendis óvíst hvort og þá hvenær yrðu byggð hús á Bakkafirði og Bolungarvík. Gert var ráð fyrir þessu skipulagi í launum rafiðnaðarmanna og hefur því ekki verið breytt síðan. Þetta fyrirkomulag gekk vel og hnökralaust með svokölluðu úthaldsfyrirkomulagi. RS hefur haldið því fram nú síðustu ár að greitt sé 15% fyrir flutningsskyldu, það kemur hvergi fram í kjarasamningum. Það er viðurkennt af hálfu RSÍ að í launum starfsmanna RS er gert ráð fyrir flutningsskyldu gagnvart starfstöð, en hver sú upphæð er hvergi skilgreint í kjarasamning og kemur hvergi fram. RS hefur þrátt fyrir ítrekaðar beiðnir RSÍ aldrei getað sýnt fram á annað.

Síðar RS byggði RS íbúðarhús á Bakkafirði og í Bolungarvík, og starfsmönnum var þá gert skylt að leigja húsin og hafa búsetu á viðkomandi stað og því fylgdu hótanir um brottrekstur ef starfsmenn sættu sig ekki við tilskipanir RS um búsetu og leigu á húsum í eigu RS. RSÍ setti fram á sínum tíma aths. þegar starfsmönnum var gert skylt að leigja hús í Bolungarvík, sem voru reist á snjóflóðasvæði. Einnig hafa ítrekaða risið deilur búsetuskyldu á Bakkafirði. Þar sem starfsmönnum er gert skylt að leigja hús þrátt fyrir að þeir nýti þau ekki. RSÍ hefur aldrei fallist á þá búsetuskyldu sem RS hefur gert starfsmönnum sínum skylt að hlýta og haldið því fram að búsetuskyldu og skyldu til leigu á húsum í eigu stofnunarinnar standist ekki landslög. Um þetta hafa staðið deilur og hefur árangurslaust verið leitað til utanríkisráðuneytisins með ósk um að það hlutist til um að þessum málum sé komið í eðlilegan farveg.

Samningur RSÍ við Ratsjárstofnum fylgir sjálfvirkt Landsvirkjunarsamningnum, en framangreindar deilur hafa tafið endurnýjun síðasta kjarasamnings. RSÍ hefur sett fram eftirfarandi kröfur :

Tekið verði upp upphaflegt úthaldsfyrirkomulag, eins og kjarasamningurinn er byggður á enn í dag. Ekki er farið fram á breytingu af okkar hálfu á ákvæðum kjarasamnings um flutningsskyldu milli starfstöðva. Við viljum að starfsmönnum sé í sjálfsvald sett hvort þeir leigi hús hjá RS. Við ítrekum fyrri óskir um að RS falli frá kröfum um búsetuskyldu og leigu á húsum.

Samningaviðræður við Kögun.
RSÍ er með kjarasamning við Kögun, það fyrirtæki er verktaki hjá Ratsjárstofnun og eins með margskonar verkefni fyrir Bandaríkjaher. Samningurinn er í öllum aðalatriðum eins og samningur sambandsins við Ratsjárstofnun. En starfsstöð Kögunar er ein þannig að ekki er um að ræða kafla um flutningsskyldu og vaktafyrirkomulag á starfstöðvum.

Umsamin lágmarkslaun á kjarasamningum RSÍ.

Á síðustu kjaramálaráðstefnu RSÍ var ákveðið að halda áfram á þeirri braut að ná upp hlut dagvinnulauna í heildarlaunum og eins að samræma lágmarkslaun í kjarasamningum rafiðnaðarmanna. Vel miðaði á þessari braut og má segja að lágmarkslaun í kjarasamningum rafiðnaðarmanna séu orðin mjög svipuð á öllum kjarasamningum. Opin launkerfi og persónubundnir samningar hafa rutt sér rúms en það gerir það að verkum að enn nauðsynlegra er að skilgreina vel hver lágmarkslaun eru hverju sinni og leggja á það áherslu að þau séu í samræmi við það sem gengur og gerist á vinnumarkaðnum hverju sinni.

Yfirlit um launabreytingar frá áramótunum 96/97

Lágmarkslaun áramótin 96/97 voru á bilinu frá kr. 48.129 til kr. 61.069 fyrir rafiðnaðarmenn með styttri en 4 ára menntun, tæknifólk. Fyrir rafiðnaðarmenn með 4 ára menntun og sveinspróf voru lágmarkslaunin kr. 64.325 til kr. 70.038. Á kjaramálaráðstenfu RSÍ settu menn sér það markmið að samræma lágmörk launa í samningunum. Ef tekinn er miðtala frá 1.1. 1997 þá hafa lágmarkslaun tæknifólks hækkað um 86% og þeirra sem hafa lokið þriggja ára námi um 110 %. Lágmarkslaun rafiðnaðarmanna með fjögurra ára nám hafa hækkað um 81%.
Laun rafiðnaðarnema á fjórða ári voru um kr. 56.000 um áramótin 96/97 en eru nú nálægt kr. 94.000 að meðaltali en hæst kr. 105.346 og hafa því hækkað um 68%.
Meðaldaglaun rafiðnaðarmanna hafa hækkað á sama tíma úr kr. 115.000 í kr. 176.000 eða um 53% og meðalheildarlaun hafa hækkað frá kr. 195.000 í kr. 285.000 eða um 46% á sama tíma hefur meðalvinnuvikan farið úr 58 tímum í um 50 tíma, þannig að í reynd hafa launin hækkað um 70%. Rétt er að vekja athygli á því að okkur miðar vel að því marki sem við settum okkur að minnka hlut yfirvinnu í launum. Nú er svo komið að margir rafiðnaðarmenn hafna alfarið allri yfirvinnu og hafa gert fasta samninga við fyrirtækin.

Lágmörk í kjarasamningum rafiðnaðarmanna

Tæknimaður sérnám sem samsvarar a.m.k. 1 ári og 1 ári í faglegu starfi	102.346
Rafiðnaðarmaður með 3ja ára fagnám Símsmiðir	114.536
Rafiðnaðarmaður með 4ja ára fagnám Rafv., Rafeindav	121.396
Aðstoðarflokksstjóri, Rafiðnaðarmaður í sjálfstjórn	144.664
Flokksstjóri, Rafiðnfr., rafiðnaðarmaður með viðbótarmenntun	153.227
Verkstjóri	171.923
Deildarstjóri	182.239

Niðurstaða endurskoðunarnefndar ASÍ og SA.
Í kjarasamningum ASÍ félaganna undanfarið ár eru ákvæði um samningsforsendur. Þar er kveðið á um að nefnd þar sem ASÍ og SA tilnefni tvo menn hvor í, skuli árlega meta til kostnaðar þá kjarasamninga sem gerðir hafa verið og meta verðlagsþróun. Nefndin átti á grundvelli þess að ákvarða hvort launahækkanir þyrftu að vera meiri en kveðið væri á um í kjarasamningunum. Ef hún kæmist ekki að niðurstöðu þá er hægt að segja upp launalið kjarasamninganna. Í þeim kjarasamningum sem gerðir voru nú um áramótin tekur þetta ákvæði ekki gildi fyrr en eftir eitt ár.

Ástæða er til að rifja upp það samkomulag sem varð á miðstjórnarfundi ASÍ síðastliðið vor um að í kjarasamninga yrðu sett samskonar ákvæði um að vísa málum til þeirrar nefndar sem kveðið var á um í samningi Flóans og SA, svo ekki þyrfti að stofna endurskoðunarnefnd fyrir hvern einasta kjarasamning. Það væri samkomulag um að í henni yrðu tveir frá SA og tveir frá ASÍ. Þeir hefðu samið fyrstir og þar af leiðandi sett inn þetta ákvæði á þeim forsendum sem þar var. Flóinn hefði ásamt starfsfólki ASÍ, sem starfaði með þeim að gerð kjarasamningsins, ekki talið sig hafa umboð til þess að gera þetta öðruvísi og þá fyrir verkalýðshreyfinguna í heild. Á umræddum miðstjórnarfundi var um það fullkomin samstaða að viðhafa þessa framkvæmd.

Nefndin komst að niðurstöðu og ákvað að orlofsuppbót í sumar muni hækka úr kr. 9.600 í kr. 20.000, árið 2002 verði hún kr. 20.300 í stað kr. 9.900, hefði átt að fara í kr. 20.600 ef hún fylgdi launabreytingum eins og kveðið er á um í kjarasamningum. Árið 2003 verði hún 20.400 í stað kr. 10.000, hefði átt að vera kr. 21.218 ef hún hefði fylgt umsömdum launabreytingum.

Desemberuppbót fer á þessu ári í kr. 35.000 í stað kr. 29.000. Árið 2002 fer hún í kr. 36.000 í stað kr. 30.000, hefði átt að fara í kr. 37.080 ef hún fylgdi umsömdum launabreytingum. Árið 2003 í kr. 37.000 í stað kr. 31.000, hefði átt að fara í kr. 38.192 ef hún fylgdi umsömdum launabreytingum. Margir furðuðu sig á því af hverju er nefndin að ákvarða þessar breytingar svona langt fram í tímann, því að samningunum er ákvæði um að hún eigi að hittast árlega og meta stöðuna.

Hagfræðingar ASÍ koma á miðstjórnarfund RSÍ.
Í forsendum nefndarinnar kemur fram; að nefndin sé sammála um að samningsbundnar upphæðir sem eru hærri en að neðan greinir skuli ekki hækka vegna niðurstöðu nefndarinnar. Þessi niðurstaða nefndar, sem er skipuð fulltrúum frá ASÍ á ofangreindum forsendum, þótti RSÍ harla einkennileg og á fundi miðstjórnar RSÍ 9. marz var fjallað um málið Á fundinn mættu Rannveig Sigurðardóttir hagfræðingur ASÍ og Ari Skúlason hagfræðingur og fyrrv. framkv.st.j ASÍ, en þau sátu í umræddri nefnd af hálfu ASÍ, en auk þess störfuðu með þeim formenn Samiðnar og Starfsgreinasambandsins. Þau fóru ítarlega yfir störf nefndarinnar og niðurstöður hennar, á eftir urðu miklar umræður. Fram kom að ekki hefði verið talin ástæða til þess að önnur félög kæmu að störfum nefndarinnar þar sem tryggingarákvæðið væru þannig orðað. Það vakti undrun miðstjórnarmanna RSÍ og var rifjuð upp samþykkt sem gerð var í miðstjórn ASÍ fyrir tæpu ári að loknum kjarasamning Flóans við SA, sem varð stefnumarkandi um aðra kjarasamninga á almennum markaði. Á umræddum miðstjórnarfundi ASÍ var samþykkt að félögin innan ASÍ myndu sameinast um að nýta það tryggingarákvæði sem Flóabandalagið hefði sett inn í sinn kjarasamning og þá grundvelli þess að í nefndinni myndu sitja hafgræðingar ASÍ, frekar en að stofnaðar yrðu jafnmargar nefndir og kjarasamningarnir yrðu. Niðurstaða miðstjórnarfundar RSÍ var að fara fram á viðræður við SA og viðsemjendur RSÍ.

Í umræðum í miðstjórn RSÍ eftir inngangserindi hagfræðinganna kom m.a. fram að miðstjórnarmenn væru í sjálfu sér sáttir við niðurstöðu nefndarinar, en áttuðu sig ekki á því hvers vegna nefndin hefði séð ástæðu til þess að undanskilja umtalsverðan hluta félagsmanna ASÍ á grundvelli þess að umræddir hópar hefðu í kjarasamningum sínum ákvæði um hærri desember- og orlofsuppbætur. Þekkt væri að þessir hópar væru bundnir á fastlaunasamningum og sætu þar af leiðandi eftir þegar launaskrið væri og þeir væru yfirleitt með lægri laun en tíðkuðust á almennum vinnumarkaði. Þessir hópar hefðu náð að hluta til leiðréttingu sinna launa með hærri desember- og orlofsuppbótum en tíðkuðust á almennum vinnumarkaði. Það væri því óskiljanlegt hvers vegna SA og ASÍ sæju ástæðu til þess að þessir hópar ættu ekki rétt á samsvarandi leiðréttingu og aðrir. Það þyrfti ekki endilega að vera í formi þess að hækka desember- og orlofsuppbætur þessara hópa og viðhalda með því bilinu á þessum eingreiðslum, allt eins væri hægt að gera það með einhverjum öðrum hætti.

Það vakti athygli miðstjórnarmanna að SA hefði séð ástæðu til þess að hækka sérstaklega desemberuppbót hjá næststærsta verkalýðsfélagi landsins í kr. 40.000 og orlofsuppbót í 15.000, þrátt fyrir að forysta þess félags væri margítrekað búin að lýsa því yfir í fjölmiðlum, að hún sæi ekki ástæðu til leiðréttinga, efnahagsástandið væri þannig og einnig hefði ítrekað komið fram hjá forystu þessa félags að það vildi ekki undir neinum kringumstæðum hækka launakjör hjá sínum félagsmönnum á grundvelli þess að önnur stéttarfélög hefðu náð betri árangri í sínum kjarasamningum. Einnig væri þetta félag með í sínum kjarasamning við SA, tryggingarákvæði sem væri öðruvísi en önnur ASÍ félög þ.á.m. RSÍ hefðu. Tryggingarákvæði þessa félags væri þannig að ekki hefði verið á grundvelli þess ástæða til að leiðrétta launakjör félagsmanna þess félags, en miðstjórn RSÍ lýsti yfir sérstakri ánægju með þetta óvænta uppátæki SA.

Á grundvelli þessa töldu miðstjórnarmenn að ekki væri ástæða til annars en bjartsýni í viðræðum við SA og ákveðið var að kalla saman samninganefndir RSÍ og fara fram á viðræður eins áður er getið.

FRÆÐSLUMÁL

Fjöldir próftaka í sveinsprófum í rafiðnaðargreinum

*Sveinspróf 1999*					*Sveinspróf 2000*
Rafvirkjun					Rafvirkjun
	Fjöldi	Stóðust	Féllu	Fall%		Fjöldi	Stóðust	Féllu	Fall%
feb.99	55	40	15	27%	feb.00	25	16	9	36%
jún.99	47	38	9	19%	jún.00	42	31	11	26%
Samtals	102	78	24	24%	Samtals	67	47	20	30%

Rafvélavirkjun					Rafvélavirkjun
	Fjöldi	Stóðust	Féllu	Fall%		Fjöldi	Stóðust	Féllu	Fall%
Feb.99	0	0	0	0%	feb.00	0	0	0	0%
Jún.99	2	2	0	0%	jún.00	0	0	0	0%
Samtals	2	2	0	0%	Samtals	0	0	0	0%

Rafveituvirkjun					Rafveituvirkjun
	Fjöldi	Stóðust	Féllu	Fall%		Fjöldi	Stóðust	Féllu	Fall%
Feb.99	0	0	0	0%	feb.00	0	0	0	0%
Jún.99	9	9	0	0%	jún.00	0	0	0	0%
Samtals	9	9	0	0%	Samtals	0	0	0	0%

Rafeindavirkjun					Rafeindavirkjun
	Fjöldi	Stóðust	Féllu	Fall%		Fjöldi	Stóðust	Féllu	Fall%
Feb.99	32	15	17	53%	feb.00	28	18	10	36%
Jún.99	32	13	19	59%	jún.00	35	18	17	49%
Samtals	64	28	36	56%	Samtals	63	36	27	43%

Símsmíði					Símsmíði
	Fjöldi	Stóðust	Féllu	Fall%		Fjöldi	Stóðust	Féllu	Fall%
Feb.99	0	0	0	0%	feb.00	6	6	0	0%
Jún.99	4	4	0	0%	jún.00	0	0	0	0%
Samtals	4	4	0	0%	Samtals	6	6	0	0%

	Fjöldi	Stóðust	Féllu	Fall%		Fjöldi	Stóðust	Féllu	Fall%
Alls	181	121	60	33%		136	89	47	35%

Starfmenntakerfi rafiðnaðarmanna það öflugasta á Íslandi.
Þegar Eftirmenntun rafiðna var stofnuð 1974 höfðu rafiðnaðarmenn þurft að horfa upp á erlenda rafiðnaðarmenn setja upp allan nýtæknibúnaðinn í Búrfellsvirkjun og í álverinu í Straumsvík. Samtök rafiðnaðaranna og fyrirtækja í rafiðnaði tóku höndum saman um að sjá til þess að íslenskum iðnaði stæðu ávallt til boða hæfir tæknimenn. Óhætt er að fullyrða að engin starfsgrein hefur lagt sjálf eins mikið fram að uppbyggingu íslensks atvinnulífs. Bilanatíðni og stöðvun vegna bilana er með því lægsta, sem þekkist. Íslenskum fyrirtækjum stendur ávallt til boða það nýjasta sem til er. Íslenskir rafiðnaðarmenn setja í dag upp allan hátæknibúnað og eru að auki að störfum við það um allan heim. Eftirmenntunarnefndir rafiðna og rafeindavirkja stofnuðu Rafiðnaðarskólann 20. september 1985. Lengst af báru nefndirnar ábyrgð á fræðslustarfinu. Árið 1993 var formlega stofnað til skólanefndar Rafiðnaðarskólans sem ber ábyrgð á starfseminni

Hratt vaxandi tölvunotkun og uppbyggingar netsins og þær breytingar sem eru að eiga sér stað á íslenskum vinnumarkaði hefur valdið því að uppbygging og skipulag náms er að gjörbreytast. Störf í tæknigreinum eru að renna saman og starfsmenntakerfið að þróast þannig að mótaðar námsbrautir, sem ljúka með prófi og veiti löghelgan aðgang að einhverju starfi, eru á undanhaldi. Vaxandi fjöldi lýkur grunndeild og fer að því loknu út á vinnumarkaðinn og sinnir tiltölulega einföldum tæknistörfum. Samfara starfsþjálfun eru valin námskeið og námsáfangar, m.ö.o. byggja sjálfur upp og móta sína menntabraut, "pick and mix education" eins og það er kallað á ensku. Sífellt er kallað á aukið framboð á sérhæfðum fagnámskeiðum í þeim menntastofnunum rafiðnaðarmanna. Þróun tölvunnar og netsins muni að öllum líkindum leggja bekkjarkennslukerfið eins og við þekkjum það í dag, að velli á næsta áratug. Í undirbúningi er að bjóða upp á gagnvirkt kennslunet í starfsmenntaskólum rafiðnaðarmanna. Þróun skólakerfisins er hæg. Það tekur langan tíma að breyta námsskrám og að því loknu tekur langan tíma að breyta kennslu. Í dag eru taldar líkur á því að framhaldskólinn muni einangrast. Hann muni einfaldlega ekki hafa tíma til þess að fylgjast með þróuninni. Bekkir muni tæmast og námið flytjast úr skólunum, mun hraðar en forráðamenn þeirra geri ráð fyrir. Framtíðin kemur af sjálfu sér, en þróunin ekki og við erum tilneydd að hefja nú þegar undirbúning vegna fyrirsjáanlegra breytinga á skólakerfinu.

Á síðasta ári voru nemendur í starfsmenntakerfi rafiðnaðarmanna tæplega 9.000, skólarnir voru reknir í tæplega 8.000 ferm. húsnæði í eigu rafiðnaðarmanna, fastir starfsmenn voru 62 og fjöldi verktaka tæplega 90. Hröð þróun í rafiðnaði kallar á síaukna starfsemi. Undanfarin misseri hafa vinsældir heildstæðra námsbrauta vaxið og eru nú svo komið að meginhluti námsframboðsins þar byggist á lengri starfsmenntabrautum. Það hefur aftur á móti kallað á formlegar útskriftir og ekki duga lítil hús til útskrifta, því Borgarleikhúsið og Íslenska óperan hafa verið leigð til útskriftar.

Rafiðnaðarskólinn.
Við Rafiðnaðarskólann eru starfandi eftirmenntunarnefndir. Þær eru Eftirmenntun rafiðna, Eftirmenntun rafeindavirkja, Eftirmenntun rafveituvirkja, Eftirmenntun símsmiða, Eftirmenntun kvikmyndahúsanna, Eftirmenntun ljósvakamiðlanna og Eftirmenntun tæknifólks í rafiðnaði. Í hverri eftirmenntunarnefnd eru fjórir fulltrúar, tveir frá launþegum og tveir frá atvinnurekendum. Fulltrúar úr nefndunum sitja í Fræðsluráði rafiðnaðarins (skólanefnd Rafiðnaðarskólans) ásamt formönnum þeirra félaga sem standa að rekstri skólans.

Framkvæmdastjórn Rafiðnaðarskólans er skipuð tveimur fulltrúum launþega (Rafiðnaðarskamband Íslands) og tveimur fulltrúum atvinnurekenda (Samtök atvinnurekenda í raf- og tölvuiðnaði). Þessir aðilar eru jafnframt eigendur skólans.

Helstu starfsmenn Rafiðnaðarskólans : Sigurður Geirsson framkv.stj, Jón Árni Rúnarsson framkv.stj., Guðfinnur Traustason verkefnastj., Haukur Konráðsson verkefnastj. og Guðmunda Kristinsdóttir verkefnastj.

CTEC á Íslandi

Í samvinnu við Microsoft verður opnaður skóli fyrir fagfólk og sérfræðinga í raf- og tölvuiðnaði sem mun sérhæfa sig fyrst til að byrja með á Microsoft lausnum. Skólinn mun bera nafnið CTEC á Íslandi og hefur starfsemi í haust að Faxafeni 10. Hann 100% í eigu Rafiðnaðarskólans.

Það hefur tíðkast að rafiðnaðarmenn í námi hverfa oft á tíðum úr námi og fara til starfa innan rafiðnaðargeirans, oft lenda menn í þannig störfum að ekki er krafist sveinsprófs, en viðkomandi sækir sérmenntun á sínu sviði í Rafiðnaðarskólanum eða annars staðar. Viðkomandi getur hvenær sem er tekið upp þráðinn og hafið nám að nýju og lokið sveinsprófi í einhverri rafiðnaðargrein. Hann fær þá metið það sérnám sem hann hefur sótt og þá starfsþjálfun sem hann hefur öðlast. Þetta fyrirkomulag hefur leitt til þess að þörfum atvinnulífsins fyrir rafiðnaðarmenn með styttri menntun hefur verið fullnægt og ekki síður, einstaklingurinn hefur ætíð haft möguleika á að bæta við sig námi. Aðstoðarmenn rafiðnaðarmanna og sérstök menntun vegna þeirra hefur þar af leiðandi aldrei tíðkast, það er engin þörf fyrir þá.

Rafiðnaðarútgáfan
Rafiðnaðarútgáfan hafa fengist við gerð og útgáfu bóka fyrir tölvukennslu síðan 1987. Titlar útgáfunar eru 34 og seldi Rafiðnaðarútgáfan 12000 bækur árið 2000.

Áður en Rafiðnaðarútgáfan var stofnuð gaf Eftirmenntun rafiðna út kennslubækur fyrir rafiðnarnámið.

Margmiðlunarskólinn
Rafiðnaðarskólinn á 50% í Margmiðlunarskólanum á móti Prenttæknistofnun. Eigendur Prennttæknistofnunar eru Samtök iðnaðarins (50%) og Félag bókargerðarmanna (50%).

Viðskipta- og tölvuskólinn

Eftirmenntunarnefnd rafeindavirkja og Eftirmenntunarnefnd rafiðna sem stofnuðu Rafiðnaðarskólann í upphafi eiga og reka Viðskipta- og tölvuskólann, Rafiðnaðarútgáfuna og Fjarkennslumiðstöð Íslands.

Fjarkennslumiðstöð Íslands

Skóli sem mun taka að sér fjarkennslu fyrir alla þá skóla sem rafiðnaðurinn kemur að og einnig fyrir aðra skóla þ.e.a.s. hýsing og aðstoð.

Netnám / Vefnám

Í undirbúningi. Kennslumiðstöð.

Opni skólinn

“Skóli án takmarkana”

Í undirbúningi

nam.is / namskeid.is

Í undirbúningi. Námsráðgjöf og áhugasviðmæling á netinu.

RTV – Menntastofnun ehf.

Viðskipta- og tölvuskólinn á fyrirtæki sem heitir RTV-Menntastofnun ehf. sem er þjónustu- og þróunarstofnun sem rekur ýmsa þjónustu t.d. fjármálaþjónustu, (bókhald, gjaldkeri) markaðsþjónustu (auglýsingagerð, vefstjórnun, vefsíðugerð) og fleira sem tilheyrir menntakerfi því sem rafiðnaðurinn kemur að.

Kvikmyndaskóli Íslands
Rafiðnaðarskólinn á 50% hlut í Kvikmyndaskóla Íslands, skólastjóri Kvikmyndaskóla Íslands, Skólastjórinn Böðvar Bjarki Pétursson, á 50% á móti Rafiðnaðarskólanum.

Fjarvídd ehf.

RTV-Menntastofnun ehf. á fyrirtæki sem heitir Fjarvídd ehf., Fjarvídd ehf. rekur kerfisleigu, hýsingu og er einnig kerfis- og netlausna fyrirtæki.

Viðskiptavinir Fjarvíddar ehf. eru:

Rafiðnaðarskólinn

CTEC á Íslandi

Viðskipta- og tölvuskólinn

Rafiðnaðarútgáfan

Fjarkennslumiðstöð Íslands

Margmiðlunarskólinn

Tölvuskóli Reykjavíkur

Kvikmyndaskólinn

Væntanlega munu þrír aðilar bætast við fyrir áramótin 2001/2002

Menntaheimur ehf.

RTV- Menntastofnun ehf. á einnig 75% í Menntaheim ehf. sem rekur Tölvuskóla Reykjavíkur. Efling stéttarfélag á 25%

Fræðsluskrifstofa rafiðnaðarins
Á haustdögum var nýjum áfanglýsingum fyrir nám í raf- og rafvélavirkjun skilað inn til Menntamálaráðuneytisins til kynningar. Þær eru nú á heimasíðu ráðuneytis í kynningu.

Í framhaldi af því lagði Menntamálaráðuneytið fram ósk til starfsgreinaráðs um að endurskoða námsskrá fyrir Grunndeild rafiðna hún er í dag 25 einingar sem er of mikið. Starfgreinaráð fól Fræðsluskrifstofunni að ganga til samninga við ráðuneytið um þessa námsskrárvinnu. Samningur við Menntamálaráðuneytið var undirritaður 13. febrúar 2001 og í beinu framhaldi var hafist handa við undirbúning að endurskoðun námsskrárinnar.

Laugardaginn 3. mars 2001 komu nokkrir kennarar af SV horninu ásamt fulltrúum Fræðsluskrifstofunnar saman til að móta tillögu fyrir stærri fund þar sem ætlunin er að skipa í vinnuhópa að námsskrárgerðinni. Þessi fundur tókst vel og þeim niðurstöðum sem fundarmenn komust að var dreift á alla þá sem boðaðir voru á fundinn 17. mars.

Fundur var síðan haldinn í Borgartúni 6 í boði menntamálaráðuneytisins laugardaginn 17. mars og hófst hann kl. 10:00 alls mættu á fundinn 16 fulltrúar frá hinum ýmsu verkmennta- og iðnskólum landsins, ásamt fulltrúa frá iðnnemum og Kristrúnu Ísaksdóttur frá Menntamálaráðuneytinu. Fyrri hluti þessa fundar fór í umræðu um námsskrána eins og hún er í dag og þær tillögur sem okkur höfðu borist, í seinni hluti fundarins var síðan unnið að drögum að áföngum og fundarmenn skiptu sér niður í 4 hópa til að vinna að áfangalýsingum fyrir GRUNNÁM RAFIÐNA eins og þetta nám kemur til með að heita.

Rætt var um nauðsyn á samræmingu á kennslugögnum og endurnýjun á þeim bókakosti sem menn hafa í dag, var nokkur umræða um fyrirkomulagið sem Danir hafa en þar er einn miðlægur grunnur á námsefni fyrir rafiðnbrautir.

Áfram verður unnið við áfangalýsingarnar, en það er von ráðuneytisins að taka þetta inn í skólakerfið sem fyrst.

Samstarf Rafiðnaðarskólans og Landsvirkjunar

Landsvirkjun hefur rekið mikinn og öflugan starfsmenntaskóla undanfarin sumur. Þar hafa um og yfir 200 ungmenni unnið að uppgræðslu lands og gróðursetningar trjágróðurs. Samhliða þessu hafa ungmennin farið í gegnum nokkra námsáfanga í jarðfræði og landnýtingu. Á þessu sviði hefur Landsvirkjun unnið mikið og farsælt starf og á mikinn heiður skilið.

Netvæðingin hefur áhrif á gerð námsáfanga og er talið nauðsynlegt að hóparnir hafi greiðan aðgang að netinu til þess að sækja upplýsingar frá t.d. Háskólanum við vinnslu ritgerða. Forstöðumaður skólans hafði samband við RSÍ og spurðist fyrir um hvort RSÍ gæti lánað tölvur til skólans í sumar. Starfsmenntastofnanir rafiðnaðarmanna eiga nokkur hundruð tölvur og standa þær ónotaðar frá miðjum júní fram í ágúst byrjun. Tekið var mjög vel í erindið og lánaði Rafiðnaðarskólinn Starfsmenntaskóla Landsvirkjunar tölvur í sumar.

SJÓÐIR RSÍ

Lífeyrissjóðurinn Lífiðn

	*1997*	*1998*	*1999*	*2000*
Ellilífeyrir	36.428.903	50.351.044	57.884.963	73.455.753
Örorkulífeyrir	37.252.593	37.514.519	40.869.245	44.983.377
Makalífeyrir	19.553.549	21.453.789	23.402.634	26.345.259
Barnalífeyrir	3.462.087	4.305.690	3.829.328	3.945.184
Samtals:	96.697.132	113.625.042	125.986.170	148.729.573

Hr. Eign til gr. lífeyris	9.949.202.256	11.328.355.781	14.396.324.404	16.277.232.524

Sjóðfélagalán	1.094.811.094	1.194.605.939	1.468.522.398	2.000.218.331

Innkomin iðgjöld	634.398.870	807.049.479	951.172.155	1.214.937.437

Lífiðn er tíundi stærsti lífeyrissjóður landsins. Eignir hans eru 16.3 milljarðar, og jukust þær um 12% á síðasta ári. Á árinu greiddu 4.936 einstaklingar til sjóðsins sem er 7% fjölgun frá árinu áður. Iðgjaldatekjur uxu um 28% á sama tíma og námu 1.214 milljónum í árslok. Samtals eiga 10.415 einstaklingar réttindi hjá sjóðnum.

Meðaltal hreinnar ávöxtunar frá stofnun er 7,2%. Ávöxtun sjóðsins á árinu 2000 var 0,2% og lækkaði mikið frá árinu áður. Síðustu mánuði ársins 2000 lækkuðu innlend og erlend hlutabréf mikið sem leiddi til þess að ávöxtun sjóðsins lækkaði verulega. Hlutfall hlutabréfa í eignasafni sjóðsins fer hækkandi og má því búast við meiri sveiflum á ávöxtun sjóðsins. Til lengri tíma litið mun hærra hlutfall hlutabréfa skila sjóðnum betri ávöxtun vegna þess að vænt ávöxtun þeirra er mun meiri en skuldabréfa.

Hlutverk Lífiðnar er að tryggja öryggi sjóðfélaganna, maka þeirra og barna, í framtíðinni. Sjóðurinn greiðir sjóðfélögum sínum elli- og örorkulífeyrir og mökum látinna sjóðfélaga fjölskyldulífeyrir. Samtrygging sjóðfélaga um örorku- og fjölskyldulífeyrir tryggir sjóðfélögum og mökum þeirra lífeyrir við óvænt áföll. Stefna Lífiðnar er að auka þjónustu á sviði heilsu og líftrygginga og fyrsta skrefið í því var að stofna okkar eigin séreignarsjóð sem býður upp á séreignarsparnað með 8 valleiðum og ættu allir að geta fundið sparnaðarleið sem hentar þeim hjá okkur. Hjá sameignarsjóðum gerir enginn kröfur um útgreiðslu arðs, heldur renna öll iðgjöld til uppbyggingar lífeyrisréttinda. Enginn hagnast á rekstri sjóðsins aðrir en sjóðfélgar.

Grundvallarlaun Lsj. Lífiðnar er nú kr. 78.723 á mánuði. Samkvæmt samþykktum sjóðsins skal gera tryggingarfræðilegaúttekt á hverju ári. Samkvæmt úttekt tryggingafræðings þá eru áfallnar skuldbindingar umfram eignir 80 millj. eða –0,2%. Ljóst er að staða Lífiðnar er eins sú besta sem þekkist á milli lífeyrissjóða. Eignir umfram áfallnar skuldbindingar eru 5,3 milljarður. Lífiðn veitir auk þess töluvert hærri og víðtækari réttindi en flestir aðrir sjóðir. Réttindi til eftirlauna eru ríflega 14% hærri en hjá flestum öðrum sjóðum. Einnig er mun öflugri tryggingarvernd, t.d. hvað varðar makalífeyrir.

Starfsmenn Lífiðnar eru 5 og meðalstöðugildi 4,5. Miklar breytingar eru í rekstri lífeyrissjóða. Öflugra eftirlit er komið á til að fylgjast með því að allir greiði í lífeyrissjóð, þessu eftirliti er fylgt eftir af skattayfirvöldum. Með nýjum kjarasamningum hefur sveigjanleiki aukist til greiðslu í séreignarsjóði og hafa margir nýtt sér það hjá Lífiðn.

Stjórn sjóðsins er skipuð eftirfarandi mönnum. Þórir Hermannsson, formaður, Níels S. Olgeirsson og Haraldur Jónsson fyrir launamenn og Arnbjörn Óskarsson, Sveinn Jónsson og Tryggvi Guðmundsson fyrir atvinnurekendur. Framkvæmdastjóri sjóðsins er Friðjón Rúnar Sigurðsson.

Starfsmenn Lífiðnar : Friðjón Þórðarson framkv.stj., innheimtumál, ávöxtun verðbréfa, Bjarni Sigfússon fulltrúi lífeyrismála og gjaldkeri, Viktor Guðmundsson skrifstofustjóri, Marin Jónsdóttir fulltrúi verðbréfaumsýslu. Á síðasta ári stofnuðu Lífiðn og Sameinaði lífeyrissjóðurinn sameiginlegt verðbréfafyrirtæki sem sér um ávöxtun séreignadeilda lífeyrissjóðanna, forstöðumaður var ráðinn Gunnar Árnason fyrrv. starfsm. Lífiðnar.

Starfsmenn innheimtudeildar : Elín Sigurðardóttir framkv.stj., bókhald. Anna María Hannesdóttir færsla innheimtukerfis, Ásta Sóley Sigurðardóttir færslur innheimtukerfis, bókhald aðildarfélaga. Sigrún Magnúsdóttir ritari, símsvörun. Ásta Kristjónsdóttir innheimta og innskráning.

Styrktarsjóður rafiðnaðarmanna

Styrktarsjóður rafiðnaðarmanna er einn af virkustu sjúkrasjóðunum og reglugerð sjóðsins veitir félagsmönnum og fjölskyldum þeirra eitt langöruggasta umhverfi sem þekkist í íslenskri verkalýðshreyfingu. Styrktarsjóðurinn greiðir félagsmönnum bætur og styrki vegna veikinda og slysa, eftir að greiðslum frá atvinnurekenda lýkur. Þá greiðir sjóðurinn einnig útfararkostnað, dánarbætur og styrkir sjóðsfélaga sem þurfa að fara sjálfir eða með einhvern úr fjölskyldu sinni til lækninga fjarri heimilum til Reykjavíkur eða erlendis. Einnig tekur sjóðurinn þátt í greiðslum vegna sjúkranudds og sjúkraþjálfunar.

Greiðslur úr styrktarsjóð hafa vaxið verulega undanfarin ár. Til þess eru nokkrar ástæður, réttindi félagsmanna hafa verið kynnt þeim ítarlega á fundum og á heimasíðunni, einnig hefur meðalaldur félagsmanna vaxið umtalsvert undanfarin ár. Fyrir nokkrum árum voru ekki margir félagsmenn í aðildarfélögum RSÍ yfir 40 ára, þeir voru undantekningalítið orðnir atvinnurekendur.

Greiðslur úr sjóðnum skiptast þannig:

*Styrkir*	*1997*	*1998*	*1999*	*2000*
Sjúkrabætur	7.164.797	21.611.314	20.983.696	36.957.190
Dánarbætur og jarðarfarir	892.710	3.587.200	4.135.000	4.106.000
Sjúkran. og sjúkraþjálfun	912.103	1.299.684	1.869.480	2.190.246
Sjúkrahúsaðgerðir	525.000	382.670	203.000	253.552
Ferðastyrkir	723.424	699.635	445.406	628.521
Líkamsr. og forvarnarstarf	711.519	1.459.022	2.295.908	3.938.545
Aðrir styrkir	1.529.030	2.513.982	4.850.893	4.392.092
Samtals	12.458.583	31.553.507	34.783.383	52.466.146

Ástæða er að geta þess að styrkir vegna fæðingarorlofs eru búnir að vera inni síðan 1987. En við bættum við 2ja vikna styrk vegna maka (föðurs), það varð til þess að þessi liður stækkaði umtalsvert og við getumhans sérstaklega núna. Þessi liður féll út nú um áramótin vegna nýrralöggjafar.

Starfsreglur styrktarsjóðs rafiðnaðarmanna.
Áríðandi er í öllum tilfellum sem bætur eru greiddar að fullnægjandi gögn liggi fyrir, s.s að reikningar sem er framvísað sé á nafn og fram komi tímabil, og/eða fjöldi skipta sem viðkomandi hefur sótt t.d. nudd. Vegna greiðslu dagpeninga í stað launa skal fylgja læknisvottorð, ásamt staðfestingu vinnuveitanda um að launagreiðslur hafi fallið niður

Dagpeningar greiðast úr sjóðnum með eftirfarandi hætti:

Dagpeningar greiðast frá þeim tíma að lögboðinni eða samningsbundinni kaupgreiðslu frá atvinnurekanda lýkur. Endurnýja þarf umsókn um dagpeninga við lok bótatímabils, (sem er 180 dagar) vari veikindi áfram. Sjóðstjórn metur hvort greitt er lengur en eitt bótatímabil og hvaða dagpeningar séu þá greiddir.

Upphæð dagpeninga skal tryggja 80% af meðallaunum viðkomandi síðustu fimm mánuði fyrir veikindi, skv. iðgjaldayfirliti til styrktarsjóðs. Hafi verulegar breytingar orðið á launum viðkomandi yfir þetta fimm mánaða tímabil er heimilt að lengja viðmiðunartímann í allt að 10 mánuði.

Sé um að ræða greiðslu vegna tímabundinnar örorku er heimilt að skerða bætur sjúkrasjóðs sem því nemur. Sjúkra- eða slysadagpeningar Tryggingarstofnunar skerða ekki dagpeningar sjúkrasjóðs.

Vegna langvarandi veikinda maka eða barna enda missi sjóðfélagi launatekjur vegna þeirra. Sé um veikindi barna að ræða þá hafi 7 daga rétturinn verið fullnýttur, og maki eigi ekki tök á að annast barnið. Vegna veikinda maka skal við það miðað að veikindi hafi staðið í amk 2 vikur.

Heimilt er sjóðstjórn að greiða hluta dagpeninga ef sjóðfélagi getur ekki vegna sjúkdóms eða slyss stundað fulla vinnu.

Dagpeningar greiðast ekki þegar um varanlega örorku eða ellihrumleika er að ræða.

Af framangreindum bótum styrktarsjóðs greiðir bótaþegi 4% í lífeyrissjóð og sjóðurinn 6%. Einnig greiðir bótaþegi félagsgjald til viðkomandi stéttarfélags.

Dæmi um sjúkra- og slysadagpeninga sjúkrasjóðs.

Tekjur fyrir veikindi eða slys

Dagpeningar sjúkrasjóðs RSÍ.

kr. 100.000 kr. 80.000

kr. 180.000 kr. 144.000

kr. 260.000 kr. 208.000

kr. 340.000 kr. 272.000

Viðkomandi getur auk þess átt rétt á sjúkra- eða slysadagpeningum frá Tryggingar-stofnun ríkisins. Bætur frá Tryggingarstofnun voru í janúar 2001 kr. 22.020 á mánuði fyrir einstakling í fullu starfi.

Við andlát sjóðfélaga skal:

a) greiða kr: 261.500.- vegna útfararkostnaðar, enda hafi viðkomandi verið sjóðfélagi í a.m.k. 6 mánuði þegar dauða hans bar að höndum.

eftirlifandi maka, eða foreldri á framfæri hins látna, verði greiddir lágmarksdagpeningar fyrir 90 daga, kr. 235.350.

fyrir hvert barn undir 18 ára aldri á framfæri viðkomandi verði greiddir lágmarksdagpeningar fyrir 90 daga, kr. 235.350.

Heimilt er að greiða lágmarksdagpeninga vegna barna til allt að 21 árs aldurs, enda hafi barn sannarlega verið á framfæri sjóðfélaga og er ekki á vinnumarkaðinum.

( Tölur miðast við grundvallarlaun Lífeyrissjóðs Lífiðnar janúar 2001)

Styrkir vegna forvarnar- og líkamsræktar :

Hafi viðkomandi verið fullgildur félagsmaður næstliðið ár þá á hann rétt á sama styrk til forvarnar- og líkamsræktar og greitt er til námskeiða. Þ.e. allt að helmingi gjalds en þó aldrei hærra en kr. 10.000 á hverju almanaksári.

Styrkur verður greiddur ef félagsmaður sýnir löggilta kvittun í frumriti þar sem fram kemur að hann hafi greitt fyrir sig kort í viðurkenndri líkamsræktarstöð eða íþróttafélagi, sundkort eða skíðakort að því tilskyldu að það sé til 3ja mán eða lengra.

Ef viðkomandi félagsmaður getur ekki lagt fram frumrit, skal hann leggja fram afrit þar sem kemur fram hversu mikið framlag vinnuveitanda er og gildir reglan hér að ofan, þ.e. styrkur getur aldrei orðið hærri en mest helming af eftirstöðvum.

Sjúkranudd, Sjúkraþjálfun og meðferð hjá kírópraktor.

Sjúkrasjóður greiðir styrk vegna þessa gegn löggiltum kvittunum að hámarki 25 skipti á ári. Greitt er 40% af heildarkostnaði fyrir hvern tíma, gegn framvísun greiðslukvittunar, ásamt tilvísun frá lækni um þjálfunina (á ekki við kírópraktor).

Áfengismeðferð.

Greiddir eru dagpeningar styrktarsjóðs í allt að 90 daga. Dagpeningar eru greiddir skv. 80% reglu sé henni viðkomið, annars lágmarksdagpeningar.

Ferðakostnaður.

Til að jafna aðstöðu þeirra sem búa á landsbyggðinni tekur sjúkrasjóður þátt í ferðakostnaði þeirra sem þurfa að fara landshluta á milli til aðgerða eða rannsókna að læknisráði. Sækja verður um styrk til TR. Sé því hafnað er greitt fyrir 40 – 250 km. kr. 3000, 250 - 400km. kr. 6000 og 400 km og lengra kr. 9000. Sé flogið er greitt ódýrasta flugfargjald á þeirri leið.

IVF meðferð.

Sjúkrasjóður tekur þátt í IVF meðferð. Greiddur er styrkur allt að kr. 75.000 auk þátttöku í ferðakostnaði sé um það að ræða. Gögn sem þurfa að berast eru: Skilavottorð frá lækni um fjölda meðferða og beinan kostnað vegna þeirra.

Lýtaaðgerðir.

Félagsmaður sem fer í lýtaaðgerð getur átt rétt á styrk einu sinni, enda hafi kostnaður verið meiri en kr. 50.000. Styrkur getur mest orðið kr. 75.000, en þó aldrei hærri en 50% af útlögðum kostnaði. Hér er átt við lýtaaðgerðir s.s. tannholdsaðgerðir, fjarlægja útlitsgalla og fl. Augnaðgerðir með laser til þess að losna við notkun gleraugna. Fegrunaraðgerðir eru ekki styrktar.

Lyfja- og lækniskostnaður.

Sjúkrasjóður tekur ekki þátt í lyfja- eða lækniskostnaði fyrr en afsláttarkorti er náð. Kostnaður umfram afsláttarkort kr. 12.000 er metið af sjóðstjórn hverju sinni. Krabbameinsskoðun er greidd af sjúkrasjóðnum.

Lágmarksdagpeningar eru kr. 2.615 samanber grundvallarlaun Lífeyrissjóðsins Lífiðnar þann 1. janúar 2001 og breytast tvisvar á ári 1. júlí og 1. janúar.

LÁTNIR FÉLAGAR FRÁ SÍÐASTA AÐALFUNDI

Þórður Jónsson

Fæddur 15/5 1940 dáinn 25/6 2000

Þórður nam rafvirkjun við Iðnskólann í Hafnarfirði og lauk sveinsprófi 1964. Þórður vann m.a. hjá Rafmótor h.f.. Íslenskum aðalverktökum, Vélsmiðjunni Kletti, Suðurnesjaverktökum, Rafi í Hafnarfirði, Jóni Bjarnasyni, Ljósvirki og Bræðrunum Ormsson. Lengst af vann Þórður hjá Íslenska Álfélaginu eða frá 1969 til dauðadags og var þar lengst af sem flokksstjóri. Þórður var sæmdur gullmerki Félags íslenskra rafvirkja.

Haukur Ákason

Fæddur 18/1 1933 dáinn 26/7 2000

Haukur lærði rafvirkjun hjá Haraldi Eggertssyni í Reykjavík. Hann lauk sveinsprófi 1953 og hlaut meistararéttindi 1956. Haukur útskrifaðist frá rafmagnsdeild Vélskóla Íslands. Hann starfaði m.a. um tíma sem rafvirki á olíuflutningaskipinu Hamrafelli, þá

starfaði hann sem flokkstjóri hjá hjá Rarik og síðar sem bæjarverkstjóri hjá Húsavíkurbæ. Haukur stofnaði sitt eigið rafverktakafyrirtæki 1966, sem síðar sameinaðist fyrirtæki sem stofnað var um rekstur slippsins á Húsavík. Árið 1994 stofnaði hann svo ásamt syni sínum fyrirtækið Víkurraf ehf., þar sem hann starfaði allt til dauðadags.

Guðjón Guðmundsson

Fæddur 18/6 1914 dáinn 6/8 2000

Guðjón hóf nám í rafvirkjun hjá Júlíusi Björnssyni 1931. Hann lauk sveinsprófi í rafvirkjun 1935 og hlaut meistararéttindi 1937. Rak eigið raftækjaverkstæði og verslun 1937-1939. Var verkstjóri og rafmagnseftirlitsmaður hjá Rafveitu Hafnarfjarðar 1939-1941. Var starfsmaður Rafmagnseftirlits ríkisins 1941-1946 og

gerðist deildar og rekstrarstjóri hjá Rafmagnsveitum ríkisins 1946, þar til hann lét af föstu starfi fyrir aldurs sakir. Guðjón var fyrsti ritstjóri Iðnnemans. Hann var í stjórn Rafvirkjafélagsins, sem síðar varð Félag íslenskra rafvirkja, 1937-1939 og var formaður 1938.

Magnús Guðmundsson

Fæddur 25/5 1939 dáinn 25/8 2000

Magnús nam rafvirkjun við Iðnskólann í Reykjavík. Hann lauk sveinsprófi 1979. Meistari hans var Hallur Björnsson. Magnús starfaði sem rafvirki hjá Kaupfélagi Borgfirðinga.

Guðni Helgason

Fæddur 27/1 1920 dáinn 17/9 2000

Guðni lærði rafvirkjun við Iðnskólann í Reykjavík. Meistari hans var Sigurður Bjarnason. Guðni lauk sveinsprófi 1947. Fékk meistarabréf 1950 og landslöggildingu 1950. Lauk prófi frá rafmagnsdeild Vélskólans í Reykjavík 1951. Starfaði hjá Sigurði Bjarnasyni í 8 ár og hjá Rafmagnsveitu Reykjavíkur í 2 ár. Eftir það rak hann eigin rafverkstæði. Guðni var heiðursfélagi í Félagi löggiltra rafverktaka í Reykjavík.

Jón Gamalíelsson

Fæddur 23/3 1923 dáinn 1/12 2000

Jón nam rafvirkjun við Iðnskólann á Siglufirði. Hann lauk sveinsprófi 1948. Meistari hans var Jóhann Jóhannesson. Jón varð rafmagnstæknifræðingur frá Osló Tekniske Skole 1957-1960. Starfaði innanlands og í Noregi við rafvirkjun til 1957 Starfaði hjá Rafmagnsveitum ríkisins 1960-1967 og frá 1967-1994 hjá Rafmagnseftirliti ríkisins sem deildartæknifræðingur og síðan deildarstjóri háspennudeildar.

Símon Andreas Marthensson Ólsen

Fæddur 20/2 1969 dáinn 17/3 2001

Símon starfaði um tíma hjá Rafskaut á Ísafirði, þar sem hann síðan hætti vegna veikinda. Hann lauk námi í rafvélavirkjun við Iðnskólann í Reykjavík árið 1997.

Kjartan Arnórsson

Fæddur 4/1 1950 dáinn 17/3 2001

Kjartan lærði rafvirkjun við Iðnskólann á Akranesi . Hann lauk sveinsprófi 1975. Meistari hans var Ármann Ármannsson. Starfaði lengst af hjá Ármanni Ármannssyni en síðustu árin starfaði hann hjá Síldar- og fiskimjölsverksmiðju HB h.f. Var sæmdur gullmerki FÍR 1999.